瓶中花
《瓶中花》Pân-tiong Hue
青春美Tshing-tshun-bí
——————————————
瓶中鮮花清芳味
pân-tiong tshinn-hue tshing-phang-bī
狂風吹來亂心機
kông-hong tshue–lâi luān sim-ki
紅顏本是為容死
hông-gân pún sī uī iông sí
心內悲調彈不離
sim-lāi pi-tiāu tuânn put-lī
花有青春再開時
hue ū tshing-tshun tsài khui sî
獨阮瓶花無春天
to̍k gún pân-hue bô tshun-thinn
薄命實在難清怡
po̍h-miā si̍t-tsāi lân tshing-î
暝日雺霧罩目墘
mî-ji̍t bông-bū tà ba̍k-kînn
怨恨園翁袂曉理
uàn-hūn hn̂g-ong buē-hiáu lí
貪財全無惜花枝
tham-tsâi tsuân bô sioh hue-ki
悽慘引出目屎滴
tshi-tshám ín tshut ba̍k-sái tih
新憂舊愁添傷悲
sin iu kū tshiû thiam siong-pi
嘆淚活泉流袂止
thàn-luī ua̍h-tsuânn lâu buē-tsí
若知這款毋出世
nā tsai tsit khuán m̄ tshut-sì
今朝蝴蝶糖蜜甜
kim-tiau ôo-tia̍p thn̂g-bi̍t-tinn
花落無人相看見
hue lo̍h bô-lâng sio khuànn-kìnn
