情歌
《情歌》Tsîng-kua
余佩真Î Puē-tsin
——————————————
引溫柔的月光
ín un-jiû ê gue̍h-kng
照入你心肝
tsiò ji̍p lí sim-kuann
引清涼的溪水
ín tshing-liâng ê khe-tsuí
沖走身軀的齷齪
tshiâng tsáu sin-khu ê ak-tsak
將花芳
tsiong hue-phang
引來囥佇你的鼻仔
ín lâi khǹg tī lí ê phīnn-á
予你每一改喘氣
hōo lí muí tsi̍t-kái tshuán-khuì
攏鼻著陣陣清芳
lóng phīnn-tio̍h tsūn-tsūn tshing-phang
引海湧共你掠龍
ín hái-íng kā lí lia̍h-lîng
予你身軀放輕鬆
hōo lí sin-khu pàng khin-sang
引天頂的流星
ín thinn-tíng ê liû-tshenn
來到你身邊做伴
lâi-kàu lí sin-pinn tsò-phuānn
將世間的美麗引來
tsiong sè-kan ê bí-lē ín–lâi
蹛佇你的頭殼
tuà tī lí ê thâu-khak
予你歡喜欣賞著
hōo lí huann-hí him-sióng tio̍h
一場一場的好夢
tsi̍t-tiûnn-tsi̍t-tiûnn ê hó-bāng
深深的情歌
tshim-tshim ê tsîng-kua
來唱予你聽
lâi tshiùnn hōo lí thiann
昨暝的煩惱
tsa-mî ê huân-ló
已經無牽掛
í-king bô khian-kuà
只賰平安相伴
tsí tshun pîng-an sio-phuānn
只賰快樂佇遮
tsí tshun khuài-lo̍k tī tsia
你啊你啊
lí–ah lí–ah
是上幸福的戇囝
sī siōng hīng-hok ê gōng-kiánn
深深的情歌
tshim-tshim ê tsîng-kua
來唱予你聽
lâi tshiùnn hōo lí thiann
用一字一字
iōng tsi̍t-jī-tsi̍t-jī
共你惜命命
kā lí sioh-miā-miā
南無觀世音菩薩
lâm-môo Kuan-sè-im-phôo-sat
南無觀世音菩薩
lâm-môo Kuan-sè-im-phôo-sat
南無觀世音菩薩
lâm-môo Kuan-sè-im-phôo-sat
南無觀世音菩薩
lâm-môo Kuan-sè-im-phôo-sat
南無觀世音菩薩
lâm-môo Kuan-sè-im-phôo-sat
南無觀世音菩薩
lâm-môo Kuan-sè-im-phôo-sat
南無觀世音菩薩
lâm-môo Kuan-sè-im-phôo-sat
南無觀世音菩薩
lâm-môo Kuan-sè-im-phôo-sat
