綠島情歌
《綠島情歌》Li̍k-tó Tsîng-kua
文夏Bûn-hā
文香Bûn-hiong
——————————————
請原諒海洋男兒
tshiánn guân-liōng hái-iûnn lâm-jî
一夜緣份拆分離
it-iā iân-hūn thiah hun-lî
行船人隨風漂動
kiânn-tsûn-lâng suî hong phiau-tōng
親像流浪的鳥兒
tshin-tshiūnn liû-lōng ê tsiáu-jî
我心內一言難盡
guá sim-lāi it-giân lân-tsīn
對你萬千的相思
tuì lí bān-tshian ê siunn-si
等後次入港日子
tán āu-tshù ji̍p-káng ji̍t-tsí
心愛的姑娘
sim-ài ê koo-niû
心愛的姑娘唷
sim-ài ê koo-niû–iooh
月琴聲陣陣入耳
ge̍h-khîm siann tsūn-tsūn ji̍p-hīnn
懷念初戀月光暝
huâi-liām tshoo-luân ge̍h-kng-mî
踮海邊綿綿情話
tiàm hái-pinn mî-mî tsîng-uē
雙人談到規半暝
siang-lâng tâm kàu kui puànn-mî
專心咧對郎熱意
tsuan-sim teh tuì lông jia̍t-ì
引阮留戀放袂離
ín gún liû-luân pàng bē-lī
為你來身魂迷亂
uī lí lâi sin-hûn bê-luān
心愛的姑娘
sim-ài ê koo-niû
心愛的姑娘唷
sim-ài ê koo-niû–iooh
明仔載準備出帆
bîn-á-tsài tsún-pī tshut-phâng
離開恩愛的母港
lī-khui un-ài ê bó-káng
放捒你孤單等待
pàng-sak lí koo-tuann tán-thāi
心內想著真毋甘
sim-lāi siūnn-tio̍h tsin m̄-kam
相信咱前世有緣
siong-sìn lán tsîng-sì ū-iân
離開千里得相逢
lī-khui tshian-lí tit siong-hông
形影會浮在目前
hîng-iánn ē phû tsāi ba̍k-tsiân
心愛的姑娘
sim-ài ê koo-niû
心愛的姑娘唷
sim-ài ê koo-niû–iooh
