八卦山
《八卦山》Pat-kuà-suann
李清風Lí Tshing-hong
——————————————
手牽小妹仔喂山頂
tshiú khan sió-muē-á–uê peh suann-tíng
雙人相好啊喂表愛情
siang-lâng siong-hó–ah-uê piáu ài-tsîng
𤆬你遊賞啊看光景
tshuā lí iû-siúnn–ah khuànn kong-kíng
予你規日啊心會清
hōo lí kui-ji̍t–ah sim ē tshing
沓沓行就行做前
ta̍uh-ta̍uh kiânn tiō kiânn tsò-tsîng
你較𠢕啊就行頭先
lí khah gâu–ah tiō kiânn thâu-sing
哎喲我娘仔喂
aih-ioh guá niû-á–uê
毋通傷閒行咿嘟
m̄-thang siunn îng-hīng–ih-toh
想欲大步弓哪哎喲
siūnn-bueh tuā-pōo king–nah-aih-ioh
𤆬娘仔遊玩啊八卦山
tshuā niû-á iû-uán–ah Pat-kuà-suann
來看大佛啊喂遮爾大
lâi khuànn Tuā-hut–ah-uê tsiah-nī tuā
造在露天啊喂無厝蓋
tsō tsāi lōo-thian–ah-uê bô tshù-kuà
坐東來向西啊喂看海外
tsē tang lâi hiòng sai–ah-uê khuànn hái-guā
孤單行就真無伴
koo-tuann kiânn tiō tsin bô-phuānn
透風落雨毋驚寒
thàu-hong lo̍h-hōo m̄-kiann kuânn
哎喲大佛啊喂
aih-ioh Tuā-hut–ah-uê
熱天袂流汗咿嘟
jua̍h-thinn buē lâu-kuānn–ih-toh
千變佮萬化哪哎喲
tshian-piàn kah bān-huà–nah-aih-ioh
也有兩支啊喂大車熕
iā ū nn̄g ki–ah-uê tuā tshia-kòng
全身是鐵啊喂直lōng-sōng
tsuân-sin sī thih–ah-uê ti̍t lōng-sōng
古早到今啊喂排古董
kóo-tsá kàu-tann–ah-uê pâi kóo-tóng
永久日曝啊喂受風霜
íng-kiú ji̍t-pha̍k–ah-uê siū hong-song
貼心仔喂聽我講
tah-sim-á–uê thiann guá kóng
恬恬仔看毋通摸
tiām-tiām-á khuànn m̄-thang bong
哎喲小娘仔喂
aih-ioh sió-niû-á–uê
行路較大方咿嘟
kiânn lōo khah tuā-hong–ih-toh
毋通亂亂傱哪哎喲
m̄-thang luān-luān tsông–nah-aih-ioh
