簿仔九个字
《簿仔九个字》Phōo-á Káu-ê Jī
李天良Lí Thian-liông
——————————————
日思夜夢咧想你
ji̍t-su iā-bāng teh siūnn lí
你敢毋知我愛你
lí kám m̄-tsai guá ài lí
偏偏共我走去覕
phian-phian kā guá tsáu-khì bih
予我逐工揣無你
hōo guá ta̍k-kang tshuē-bô lí
無你三頓無滋味
bô lí sann-tǹg bô tsu-bī
半暝想甲睏袂去
puànn-mî siūnn kah khùn buē-khì
希望佮你成知已
hi-bāng kah lí sîng ti-kí
嘛免逐工閣逐你
mā bián ta̍k-kang koh jiok lí
身邊有你伴相隨
sin-pinn ū lí phuānn-sio-suî
銀行簿仔九个字
gîn-hâng-phōo-á káu-ê jī
毋免拚甲喘袂離
m̄-bián piànn kah tshuán buē-lī
阮上瑪摺就是你
gún siōng má-tsih tsiū-sī lí
