是你毋甘嫌
《是你毋甘嫌》Sī Lí M̄-kam Hiâm
王壹珊Ông It-san
——————————————
你彼對目睭
lí hit tuì ba̍k-tsiu
親像會講話
tshin-tshiūnn ē kóng-uē
看甲予阮真歹勢
khuànn kah hōo gún tsin pháinn-sè
敢是阮穿插有較花
kám-sī gún tshīng-tshah ū khah hue
佮阮的面無四配
kah gún ê bīn bô sù-phuè
親情佮朋友
tshin-tsiânn kah pîng-iú
有對阮講過
ū tuì gún kóng–kuè
講阮雖然真好禮
kóng gún sui-jiân tsin hó-lé
可惜是耐性無夠濟
khó-sioh sī nāi-sìng bô-kàu tsuē
將來敢會真歹嫁
tsiong-lâi kám ē tsin pháinn kè
是你對阮
sī lí tuì gún
問長閣問短
mn̄g tn̂g koh mn̄g té
無相棄嫌
bô sio khì-hiâm
願意來交陪
guān-ì lâi kau-puê
將阮當做一蕊好花
tsiong gún tòng-tsuè tsi̍t-luí hó hue
袂來看懸無看低
bē lâi khuànn kuân bô khuànn kē
從今後囥入心肝底
tsiông-kim-āu khǹg ji̍p sim-kuann-té
一世人雙人倚做伙
tsi̍t-sì-lâng siang-lâng uá tsò-hué
男歡女愛無反悔
lâm-huan lú-ài bô huán-hué
