頇顢
《頇顢》Han-bān
洪義洲Âng Gī-tsiu
——————————————
你講你頇顢紩衫
lí kóng lí han-bān thīnn-sann
你講你頇顢煮食
lí kóng lí han-bān tsú-tsia̍h
頇顢的手
han-bān ê tshiú
捧著斷翼鳥隻
phóng tio̍h tn̄g si̍t tsiáu-tsiah
頇顢將阮
han-bān tsiong gún
晟養甲遮爾大
tshiânn-ióng kah tsiah-nī tuā
毋捌一仙銀買衫家己換
m̄-bat tsi̍t-sián gîn bé sann ka-tī uānn
毋捌一字苦囥咧心肝
m̄-bat tsi̍t-jī khóo khǹg teh sim-kuann
苦澀目箍
khóo-siap ba̍k-khoo
紅紅疼疼
âng-âng thiànn-thiànn
上煩惱看阮出門的背影
siōng huân-ló khuànn gún tshut-mn̂g ê puē-iánn
心頭肉
sim-thâu-bah
是你叫阮的名
sī lí kiò gún ê miâ
阿母
a-bú
是我毋敢喝出的聲
sī guá m̄-kánn huah-tshut ê siann
故鄉的月
kòo-hiong ê gue̍h
若有聽著啊
nā ū thiann–tio̍h ah
替我照顧厝內的序大
thè guá tsiàu-kòo tshù-lāi ê sī-tuā
