有孝趁這陣
《有孝趁這陣》Iú-hàu Thàn Tsit-tsūn
洪維謙Âng Uî-khiam
——————————————
門口埕的舊烏肚䆀
mn̂g-kháu-tiânn ê kū oo-tóo-bái
有阿爸阿母幸福的背影
ū a-pah a-bú hīng-hok ê puē-iánn
看著厝內的序大
khuànn-tio̍h tshù-lāi ê sī-tuā
一幕一幕想著較早
tsi̍t-bōo-tsi̍t-bōo siūnn-tio̍h khah-tsá
細漢時陣枵飽吵
suè-hàn sî-tsūn iau-pá-tshá
就有含仔糖通好食
tiō ū kâm-á-thn̂g thang-hó tsia̍h
毋管阮這馬幾歲
m̄-kuán gún tsit-má kuí-huè
恁已經頭鬃白
lín í-king thâu-tsang pe̍h
猶原將阮當做寶貝
iu-guân tsiong gún tòng-tsuè pó-puè
哎喲!我的爸爸媽媽
aih-iooh! guá ê pá-pah má-mah
共阮惜命命
kā gún sioh-miā-miā
有一工
ū-tsi̍t-kang
賰一个人
tshun tsi̍t-ê-lâng
啊~減一个伴
ah~ kiám tsi̍t-ê phuānn
有一工
ū-tsi̍t-kang
聽無我咧講啥
thiann-bô guá teh kóng siánn
電話仝款一直敲
tiān-uē kāng-khuán it-ti̍t khà
有一工
ū-tsi̍t-kang
敢會袂認得我
kám ē buē jīn-teh guá
予我心肝搐搐疼
hōo guá sim-kuann tiuh-tiuh-thiànn
有一工
ū-tsi̍t-kang
我嘛會老
guá mā ē lāu
趁這陣
thàn tsit-tsūn
會赴共恁有孝
ē-hù kā lín iú-hàu
