陷眠
《陷眠》Hām-bîn
阿跨面(Aquaman)
——————————————
我勇敢拍拚
guá ióng-kám phah-piànn
煞一直和成功相閃
suah it-ti̍t hām sîng-kong sio-siám
將咱的故事
tsiong lán ê kòo-sū
寫成歌
siá sîng kua
譜成咱的美夢
phóo sîng lán ê bí-bāng
l have to keep running
佇海岸邊的暗暝
tī hái-huānn pinn ê àm-mî
一切變甘甜
it-tshè piàn kam-tinn
前方的路
tsîng-hong ê lōo
咱共時間
lán kā sî-kan
閣倒轉去兩冬前
koh tò-tńg-khì nn̄g-tang tsîng
佇昨暝
tī tsa-mî
想起彼陣
siūnn-khí hit-tsūn
算是大工程
sǹg-sī tuā kang-tîng
第一擺寫了閣會使
tē-it pái siá liáu koh ē-sái
感覺閣袂䆀
kám-kak koh bē-bái
陷眠嘛無想到
hām-bîn mā bô siūnn-kàu
我會徛踮這个舞臺
guá ē khiā tiàm tsit ê bú-tâi
咧比賽
teh pí-sài
身軀垃圾拌掉
sin-khu lah-sap puānn tiāu
毋驚跋倒
m̄-kiann pua̍h-tó
這是我的人生
tse sī guá ê jîn-sing
我的翕欱
guá ê hip-hop
交予我來發落
kau hōo guá lâi hua̍t-lo̍h
我知過去
guá tsai kuè-khì
有偌艱苦
ū guā kan-khóo
我共家己講
guá kā ka-tī kóng
愛加油
ài ka-iû
永遠會記
íng-uán ē-kì
第一擺的表演
tē-it pái ê piáu-ián
無人共咱捀場
bô-lâng kā lán phâng-tiûnn
我講Aquaman
guá kóng Aquaman
你是準備好未
lí sī tsún-pī hó–buē
我頓胸坎
guá tǹg hing-khám
共我的兄弟回答
kā guá ê hiann-tī huê-tap
always ok ok
放下我所有的牽掛愛人
pàng-hā guá sóo-ū ê khian-kuà ài-jîn
這改我欲自由飛
tsit kái guá beh tsū-iû pue
盒仔內賰尾枝
a̍p-á lāi tshun bué-ki
上北時啖糝
tsiūnn-pak sî tām-sám
轉來的時陣
tńg-lâi ê sî-tsūn
我會變了無仝款
guá ē piàn liáu bô kāng-khuán
咱的所有拍拚
lán ê sóo-ū phah-piànn
換來你一句無通
uānn lâi lí tsi̍t-kù bô-thang
這馬所有苦楚
tsit-má sóo-ū khóo-tshóo
等待彼泡茶回甘
tán-thāi hit phàu tê huê-kam
我勇敢拍拚
guá ióng-kám phah-piànn
煞一直和成功相閃
suah it-ti̍t hām sîng-kong sio-siám
將咱的故事
tsiong lán ê kòo-sū
寫成歌
siá sîng kua
譜成咱的美夢
phóo sîng lán ê bí-bāng
l have to keep running
佇海岸邊的暗暝
tī hái-huānn pinn ê àm-mî
一切變甘甜
it-tshè piàn kam-tinn
前方的路
tsîng-hong ê lōo
總是燈火通明
tsóng-sī ting-hué thong-bîng
我勇敢拍拚
guá ióng-kám phah-piànn
煞一直和成功相閃
suah it-ti̍t hām sîng-kong sio-siám
將咱的故事
tsiong lán ê kòo-sū
寫成歌
siá sîng kua
譜成咱的美夢
phóo sîng lán ê bí-bāng
用我這世人的人生
iōng guá tsit-sì-lâng ê jîn-sing
歌我繼續寫
kua guá kè-sio̍k siá
這段過程咧走傱
tsit tuānn kuè-tîng teh tsáu-tsông
我比誰閣較雄
guá pí siáng koh-khah hiông
放下過去的家己
pàng-hā kuè-khì ê ka-tī
我變了閣較強
guá piàn liáu koh-khah kiông
開始變化的我
khai-sí piàn-huà ê guá
知影一切
tsai-iánn it-tshè
愛用心來聽
ài iōng-sim lâi thiann
就算比到冠軍賽
tiō-sǹg pí kàu kuan-kun-sài
我嘛照常shout out水源兄
guá mā tsiàu-siông shout out Tsuí-guân-hiann
猶原前行不退
iu-guân tsiân-hîng put-thè
喝出少年家這三字
huah tshut siàu-liân-ke tsit sann-jī
想欲得著功名進前
siūnn-beh tit-tio̍h kong-bîng tsìn-tsîng
愛先對會起你家己
ài sing tuì ē-khí lí ka-tī
做人不偷不搶
tsò-lâng put-thau put-tshiúnn
心態袂使拉顛
sim-thài bē-sái la-thian
阿爸阿母叫我
a-pah a-bú kiò guá
跤踏實地
kha ta̍h si̍t-tē
袂使行偏
bē-sái kiânn phian
這我攏知
tse guá lóng tsai
知影
tsai-iánn
一切我攏知影
it-tshè guá lóng tsai-iánn
有時陣講話較大聲
ū-sî-tsūn kóng-uē khah tuā-siann
仝款是恁的乖囝
kāng-khuán sī lín ê kuai-kiánn
無想欲出一支喙
bô siūnn-beh tshut tsi̍t-ki tshuì
所以我踏出一跤步
sóo-í guá ta̍h-tshut tsi̍t kha-pōo
想欲佮阮兄弟做大
siūnn-beh kah gún hiann-tī tsò tuā
選擇離開大灣路
suán-ti̍k lī-khui Tuā-uan-lōo
仝款據在恁笑我
kāng-khuán kì-tsāi lín tshiò guá
恁一支喙炸甲
lín tsi̍t-ki tshuì tsuànn kah
我只煩惱我這枝筆
guá tsí huân-ló guá tsit ki pit
會寫甲無墨矣
ē siá kah bô ba̍k–ah
我齪甲
guá tsak kah
暗暝閣愛加班
àm-mî koh ài ka-pan
將我跤步踏予穩
tsiong guá kha-pōo ta̍h hōo ún
講出我代表東山
kóng tshut guá tāi-piáu Tong-san
無想欲keep a low
bô siūnn-beh keep a low
所以我攑mài-kuh起去講
sóo-í guá gia̍h mài-kuh khí-khì kóng
有人佇背後看咱無
ū-lâng tī puē-āu khuànn lán bô
今年會過了比你爽
kin-nî ē kuè-liáu pí lí sóng
隨在恁按怎攻擊批評
suî-tsāi lín án-nuá kong-kik phue-phîng
甚至叫我遛穗仔
sīm-tsì kiò guá liù-sui-á
動我會用得
tāng guá ē-īng-tit
不准恁動我的兄弟仔
put-tsún lín tāng guá ê hiann-tī-á
一步做三步行
tsi̍t-pōo tsò sann-pōo kiânn
光榮入阮兜的埕
kong-îng ji̍p gún tau ê tiânn
佮阮兄弟勇敢做夢
kah gún hiann-tī ióng-kám tsò-bāng
免用金錢共我唌
bián iōng kim-tsînn kā guá siânn
感謝當初彼个家己
kám-siā tong-tshoo hit ê ka-tī
堅持選擇行這條路
kian-tshî suán-ti̍k kiânn tsit tiâu lōo
嘛感謝我的兄弟
mā kám-siā guá ê hiann-tī
將我當做恁的驕傲
tsiong guá tòng-tsò lín ê kiau-ngōo
Aquaman
一枝草
tsi̍t-ki tsháu
一點露
tsi̍t-tiám lōo
你嘛已經行到遮來
lí mā í-king kiânn kàu tsia lâi
有人陪你走
ū-lâng puê lí tsáu
怹有偌感動
in ū guā kám-tōng
看著你徛佇這个舞臺
khuànn-tio̍h lí khiā tī tsit ê bú-tâi
就親像咧拍電影
tiō tshin-tshiūnn teh phah tiān-iánn
故事沿路行沿路寫
kòo-sū iân-lōo kiânn iân-lōo siá
你會當更加確定
lí ē-tàng kìng-ka khak-tīng
你是為著啥
lí sī uī-tio̍h siánn
你為著啥
lí uī-tio̍h siánn
我為著
guá uī-tio̍h
無愛予怹失望
bô-ài hōo in sit-bōng
為著啥
uī-tio̍h siánn
開始叫家己袂使侗戇
khai-sí kiò ka-tī bē-sái tòng-gōng
為著啥
uī-tio̍h siánn
變清醒
piàn tshing-tshénn
袂閣執迷不悟
bē koh tsip-bê put-ngōo
為著啥
uī-tio̍h siánn
問你到底為著啥
mn̄g lí tàu-té uī-tio̍h siánn
你為著啥
lí uī-tio̍h siánn
開始有查埔人的肩胛
khai-sí ū tsa-poo-lâng ê king-kah
為著啥
uī-tio̍h siánn
開始珍惜簡單的生活
khai-sí tin-sioh kán-tan ê sing-ua̍h
為著啥
uī-tio̍h siánn
孤單暗暝閃爍的燈塔
koo-tuann àm-mî siám-sih ê ting-thah
為著啥
uī-tio̍h siánn
問你到底為著啥
mn̄g lí tàu-té uī-tio̍h siánn
才會選擇翕欱
tsiah ē suán-ti̍k hip-hop
