樹尾風
《樹尾風》Tshiū-bué Hong
阿財唸歌樂團A-tsâi Liām-kua Ga̋k-thuân
——————————————
你敢猶會記得
lí kám iáu ē-kì-eh
細漢的時
suè-hàn ê sî
阿娘按怎咧共咱惜
a-niâ án-ná teh kā lán sioh
你敢猶會記得
lí kám iáu ē-kì-eh
細漢的時
suè-hàn ê sî
阿爸按怎咧共咱搖
a-pa án-ná teh kā lán iô
為啥物你出外到這陣
uī-siánn-mih lí tshut-guā kàu tsit-tsūn
攏毋捌倒轉去
lóng m̄-bat tò-tńg–khì
為啥物你攏毋捌想起
uī-siánn-mih lí lóng m̄-bat siūnn-khí
過去的好日子
kuè-khì ê hó ji̍t-tsí
敢講你為著前途
kám-kóng lí uī-tio̍h tsiân-tôo
咧拍拚無時間
teh phah-piànn bô sî-kan
敢講你為著理想
kám-kóng lí uī-tio̍h lí-sióng
咧拍拚遐無閒
teh phah-piànn hiah bô-îng
你放你的老爸咧孤單
lí pàng lí ê lāu-pē teh koo-tuann
你放你的老母咧目屎流
lí pàng lí ê lāu-bú teh ba̍k-sái lâu
你一心一意
lí it-sim-it-ì
想欲做大生理
siūnn-beh tsuè tuā sing-lí
來佮人比並
lâi kah lâng pí-phīng
你一心一意
lí it-sim-it-ì
想欲去趁大錢
siūnn-beh khì thàn-tuā-tsînn
來過好日子
lâi kuè hó ji̍t-tsí
日子一工一工過
ji̍t-tsí tsi̍t-kang-tsi̍t-kang kuè
爸母一年一年老
pē-bú tsi̍t-nî-tsi̍t-nî lāu
你出外到這陣
lí tshut-guā kàu tsit-tsūn
攏毋捌倒轉去
lóng m̄-bat tò-tńg–khì
兩个老歲仔
nn̄g-ê lāu-huè-á
相依為命咧過日子
siong-i uî-bīng teh kuè ji̍t-tsí
怹攏等無你倒轉去
in lóng tán-bô lí tò-tńg–khì
怹攏等無你的批信
in lóng tán-bô lí ê phue-sìn
就算講
tiō-sǹg-kóng
你做大生理趁大錢
lí tsuè tuā sing-lí thàn-tuā-tsînn
你過了敢有意義
lí kuè-liáu kám ū ì-gī
爸母疼囝
pē-bú thiànn kiánn
長流水
tn̂g lâu-tsuí
望囝有孝
bāng kiánn iú-hàu
親像樹尾風
tshin-tshiūnn tshiū-bué hong
爸母疼囝
pē-bú thiànn kiánn
長流水
tn̂g lâu-tsuí
望囝有孝
bāng kiánn iú-hàu
親像樹尾風
tshin-tshiūnn tshiū-bué hong
