爸母的心願
《爸母的心願》Pē-bú ê Sim-guān
林清國Lîm Tshing-kok
——————————————
爸母飼咱大漢
pē-bú tshī lán tuā-hàn
受風受雨無怨嘆
siū-hong siū-hōo bô uàn-thàn
予咱穿衫佮讀書
hōo lán tshīng-sann kah tha̍k-tsu
毋驚趁錢遮艱難
m̄-kiann thàn-tsînn tsiah kan-lân
咱冊著讀予絚
lán tsheh tio̍h tha̍k hōo ân
成績考予讚
sîng-tsik khó hōo tsán
毋通佮人摸酒矸
m̄-thang kah lâng bong tsiú-kan
朋友好好選
pîng-iú hó-hó suán
毋通學野蠻
m̄-thang o̍h á-bân
食薰跋筊著莫犯
tsia̍h-hun pua̍h-kiáu tio̍h mài huān
自己的前途
tsū-kí ê tsiân-tôo
著好好打算
tio̍h hó-hó tá-suàn
毋通辜負爸母的心願
m̄-thang koo-hū pē-bú ê sim-guān
爸母晟咱大漢
pē-bú tshiânn lán tuā-hàn
受風受雨無怨嘆
siū-hong siū-hōo bô uàn-thàn
助咱成家佮立業
tsōo lán sîng-ke kah li̍p-gia̍p
毋驚手頭遮爾絚
m̄-kiann tshiú-thâu tsiah-nī ân
彼號家庭著合和
hit-lō ka-tîng tio̍h ha̍p-hô
事業做予讚
sū-gia̍p tsò hōo tsán
毋通佮人濫使牽
m̄-thang kah lâng lām-sú khan
朋友好好選
pîng-iú hó-hó suán
目門激予懸
ba̍k-mn̂g kik hōo kuân
揣鬼問藥會慘澹
tshuē kuí mn̄g io̍h ē tshám-tām
自己的前途
tsū-kí ê tsiân-tôo
著好好打算
tio̍h hó-hó tá-suàn
毋通辜負爸母的心願
m̄-thang koo-hū pē-bú ê sim-guān
