欲交免驚無
《欲交免驚無》Beh Kau Bián-kiann Bô
林清國Lîm Tshing-kok
——————————————
你真活潑人人好
lí tsin ua̍t-phuat lâng-lâng hó
談情你也來滾笑
tâm-tsîng lí iā lâi kún-tshiò
予你蓋甲玲瑯遨
hōo lí kài kah lin-long gô
才講無愛佮我好
tsiah kóng bô-ài kah guá hó
你真予人袂呵咾
lí tsin hōo-lâng buē o-ló
害我了工面子無
hāi guá liáu-kang bīn-tsú bô
騙請害枵做會落
phiàn tshiánn hāi iau tsuè ē-lo̍h
予我仙想想攏無
hōo guá sian siūnn siūnn lóng bô
是我看你無清楚
sī guá khuànn lí bô tshing-tshó
才毋著
tsiah m̄-tio̍h
命底佮你緣份薄
miā té kah lí iân-hūn po̍h
無奈何
bô-nāi-hô
事業頭路做予好
sū-gia̍p thâu-lōo tsuè hōo hó
毋通趖
m̄-thang sô
成功欲交免驚無
sîng-kong beh kau bián-kiann bô
有較好
ū khah hó
你真活潑人人好
lí tsin ua̍t-phuat lâng-lâng hó
談情你也來滾笑
tâm-tsîng lí iā lâi kún-tshiò
予你蓋甲玲瑯遨
hōo lí kài kah lin-long gô
才講無愛佮我好
tsiah kóng bô-ài kah guá hó
