雨夜的花蕊
《雨夜的花蕊》Ú-iā ê Hue-luí
良山Liông-san
——————————————
青紅燈閃閃爍
tshinn-âng-ting siám-siám-sih
伊不在身邊
i put-tsāi sin-pinn
薰酒的芳味
hun-tsiú ê phang-bī
引人心迷醉
ín lâng sim bê-tsuì
阮就是雨夜花蕊
gún tsiū-sī ú-iā hue-luí
暗時才咧開
àm-sî tsiah teh khui
酒女的心內
tsiú-lú ê sim-lāi
有誰會了解
ū siáng ē liáu-kái
你愛我我愛你
lí ài guá guá ài lí
正當的代誌
tsìng-tong ê tāi-tsì
偏偏只有我
phian-phian tsí-ū guá
毋敢來表示
m̄-kánn lâi piáu-sī
因為阮雨夜花蕊
in-uī gún ú-iā hue-luí
身份配袂起
sin-hūn phuè buē-khí
想著心哀悲
siūnn-tio̍h sim ai-pi
暗中吐大氣
àm-tiong thóo-tuā-khuì
人青春有幾時
lâng tshing-tshun ū kuí-sî
春去秋又來
tshun khì tshiu iū lâi
添阮心悲哀
thiam gún sim pi-ai
憂悶在心內
iu-būn tsāi sim-lāi
純情的雨夜花蕊
sûn-tsîng ê ú-iā hue-luí
境遇無人知
kíng-bū bô-lâng tsai
啥人欲關懷
siánn-lâng bueh kuan-huâi
花蕊在苦海
hue-luí tsāi khóo-hái
