浮浪貢
《浮浪貢》Phû-lōng-kòng
李英宏Lí Ing-hông
——————————————
早就共你講
tsá tō kā lí kóng
這个真兩光
tsit-ê tsin lióng-kong
看起來博士博
khuànn–khí-lâi phok-sū-phok
圓仔若像真𠢕挲啊
înn-á ná-tshiūnn tsin gâu so–ah
社會咧走傱
siā-huē teh tsáu-tsông
攏無佇咧講信用
lóng bô tī-teh kóng sìn-iōng
毋通烏白招
m̄-thang oo-pe̍h tsio
信篤一寡仔浮浪貢
sìn-táu tsi̍t-kuá-á phû-lōng-kòng
早就共你講
tsá tō kā lí kóng
這个真兩光
tsit-ê tsin lióng-kong
看起來博士博
khuànn–khí-lâi phok-sū-phok
圓仔若像真𠢕挲啊
înn-á ná-tshiūnn tsin gâu so–ah
社會咧走傱
siā-huē teh tsáu-tsông
攏無佇咧講信用
lóng bô tī-leh kóng sìn-iōng
毋通烏白招
m̄-thang oo-pe̍h tsio
信篤一寡仔浮浪貢
sìn-táu tsi̍t-kuá-á phû-lōng-kòng
浮浪貢
phû-lōng-kòng
哎唷!這聲䆀囉
aih-ioh! tsit-siann bái–looh
恁爸予你害甲
lín-pē hōo lí hāi kah
規組爛糊糊
kui-tsoo nuā kôo-kôo
我會倒
guá ē tó
生雞卵的無
senn ke-nn̄g ê bô
屎攏四界烏白糊
sái lóng sì-kè oo-pe̍h kôo
彼支喙真𠢕炸
hit ki tshuì tsin gâu tsuànn
炸甲實在真離譜
tsuànn kah si̍t-tsāi tsin lī-phóo
手路傷粗
tshiú-lōo siunn tshoo
害恁爸煞掣一趒
hāi lín-pē suah tshuah tsi̍t-tiô
像這款的標準
tshiūnn tsit khuán ê piau-tsún
哥哥
kó-koh
你敢是咧講耍笑
lí kám-sī teh kóng-sńg-tshiò
聽你講規晡
thiann lí kóng kui-poo
講甲喙角攏是波
kóng kah tshuì-kak lóng-sī pho
啥物OK OK Bro
siánn-mih OK OK Bro
咱這擺一定會成功
lán tsit pái it-tīng ē sîng-kong
這嘛好
tse mā-hó
彼嘛好
he mā-hó
敢若啥物攏撨會著
kánn-ná siánn-mih lóng tshiâu ē-tio̍h
你講絕對會創甲妥當
lí kóng tsua̍t-tuì ē tshòng kah thò-tòng
一定會伨我
it-tīng ē thīn guá
伨到規路
thīn kàu kui-lōo
看你咖啡是催真雄
khuànn lí ka-pi sī tshui tsin hiông
倒佇膨椅咧講理想
tó tī sua phòng-í teh kóng lí-sióng
爽甲喙笑目笑
sóng kah tshuì-tshiò-ba̍k-tshiò
愈講愈成你猶閣咧讀國小
jú kóng jú sîng lí iáu-koh teh tha̍k kok-sió
袂爽
bē sóng
敢若怪怪
kánn-ná kuài-kuài
敢若怪怪
kánn-ná kuài-kuài
我講袂出來
guá kóng bē tshut-lâi
怹敢若suâinn-suâinn
in kánn-ná suâinn-suâinn
敢若袂在
kánn-ná bē tsāi
我敢按呢交代
guá kám án-ne kau-tài
創啥趖
tshòng sánn-sô
害咱頭殼𢯾咧燒
hāi lán thâu-khak mooh teh sio
規𡳞脬火
kui lān-pha hué
他猶佇遐激No No
thann iáu tī hia kik No No
—
我早就共你講
guá tsá tō kā lí kóng
怹攏咧烏白創
in lóng teh oo-pe̍h tshòng
話攏四界亂講
uē lóng sì-kè luān-kóng
三不五時就來跳票
sam-put-gōo-sî tō lâi thiàu-phiò
社會佇咧走傱
siā-huē tī-leh tsáu-tsông
煞攏無咧講信用
suah lóng bô teh kóng sìn-iōng
你就是人傷怐
lí tō-sī lâng siunn khòo
信篤一寡仔浮浪貢
sìn-táu tsi̍t-kuá-á phû-lōng-kòng
