城市
《城市》Siânn-tshī
吳淑敏Ngôo Siok-bín
——————————————
虛虛華華的城市
hi-hi-hua-hua ê siânn-tshī
看青青紅紅燈閃爍
khuànn tshinn-tshinn-âng-âng ting siám-sih
過往的人歡歡喜喜
kuè-óng ê lâng huann-huann-hí-hí
只有我一人心空虛
tsí-ū guá tsi̍t-lâng sim khang-hi
踮這个繁華的都市
tiàm tsit ê huân-huâ ê too-tshī
無人會去
bô-lâng ē khì
注意我心內傷悲
tsù-ì guá sim-lāi siong-pi
快樂暗暝只有我
khuài-lo̍k àm-mî tsí-ū guá
予人放袂記
hōo-lâng pàng-buē-kì
虛虛華華的城市
hi-hi-hua-hua ê siânn-tshī
有你我愛情的甜蜜
ū lí guá ài-tsîng ê tinn-bi̍t
兩人最愛啉的咖啡
nn̄g-lâng tsuè ài lim ê ka-pi
如今也已經無芳味
jû-kim iā í-king bô phang-bī
踮這个繁華的都市
tiàm tsit ê huân-huâ ê too-tshī
藏著你我兩人
tshàng tio̍h lí guá nn̄g-lâng
失去的記持
sit–khì ê kì-tî
日日留戀這城市
ji̍t-ji̍t liû-luân tse siânn-tshī
揣咱的過去
tshuē lán ê kuè-khì
自從你離開阮身邊
tsū-tsiông lí lī-khui gún sin-pinn
做啥物攏失去滋味
tsuè siánn-mih lóng sit-khì tsu-bī
風吹來
hong tshue–lâi
親像你的聲音
tshin-tshiūnn lí ê siann-im
予我目屎流袂離
hōo guá ba̍k-sái lâu buē-lī
自從你離開阮身邊
tsū-tsiông lí lī-khui gún sin-pinn
才知影最愛的是你
tsiah tsai-iánn tsuè-ài–ê sī lí
可惜你永遠
khó-sioh lí íng-uán
攏袂當聽見
lóng buē-tàng thiann–kìnn
