打貓員外
《打貓員外》Tánn-niau Uân-guē
石喬Tsio̍h-kiâu(石橋Tsio̍h-kiô)
——————————————
咚咚咚咚咚鏘
tong-tong-tong-tong tong-tshiàng
咚咚咚咚咚鏘
tong-tong-tong-tong tong-tshiàng
咚咚咚咚咚鏘
tong-tong-tong-tong tong-tshiàng
咚鏘咚鏘
tong-tshiàng tong-tshiàng
咚咚咚咚咚鏘
tong-tong-tong-tong tong-tshiàng
嘿!打貓庄老員外
heh! Tánn-niau tsng lāu uân-guē
田園斑鴿飛袂過
tshân-hn̂g pan-kah pe buē-kè
保鏢外掌倩真濟
pó-pio guā-tsiáng tshiànn tsin tsuē
奴才𡢃婢百外个
lôo-tsâi kán-pī pah-guā ê
有的野心起暗計
ū-ê iá-sim khí àm-kè
也有忠心顧頭家
iā ū tiong-sim kòo thâu-ke
也有歪心想趁錢
iā ū uai-sim siūnn thàn-tsînn
也有綴人戇戇踅
iā ū tuè lâng gōng-gōng se̍h
老員外仁慈又好禮
lāu uân-guē jîn-tsû iū hó-lé
鋪路造橋愛救世
phoo-lōo tsō-kiô ài kiù-sè
田佃恩情受真濟
tshân-tiān un-tsîng siū tsin tsuē
燒香拜佛祈禱老員外
sio-hiunn pài-pu̍t kî-tó lāu uân-guē
食百二歲
tsia̍h pah-jī huè
人人尊敬
lâng-lâng tsun-kìng
人人呵咾
lâng-lâng o-ló
打貓庄
Tánn-niau-tsng
彼个好心的老員外
hit ê hó-sim ê lāu uân-guē
咚咚咚咚咚鏘
tong-tong-tong-tong tong-tshiàng
