對面彼个姑娘
《對面彼个姑娘》Tuì-bīn Hit ê Koo-niû
石喬Tsio̍h-kiâu(石橋Tsio̍h-kiô)
——————————————
對面的彼个姑娘
tuì-bīn ê hit ê koo-niû
有一對迷人目睭
ū tsi̍t-tuì bê-lâng ba̍k-tsiu
伊時常踮在樓窗
i sî-siông tiàm-tsāi lâu-thang
為情為愛一直想
uī tsîng uī ài it-ti̍t siūnn
空等待迫伊心憂愁
khang tán-thāi pik i sim iu-tshiû
我雖然為伊心擔憂
guá sui-jiân uī i sim tam-iu
我時常為伊擔憂
guá sî-siông uī i tam-iu
我佮伊並無熟似
guá kah i pīng bô si̍k-sāi
替伊擔憂啥路用
thè i tam-iu siánn lōo-iōng
連我也暝日心憂愁
liân guá iā mî-ji̍t sim iu-tshiû
對面的彼个姑娘
tuì-bīn ê hit ê koo-niû
有一个心愛情侶
ū tsi̍t-ê sim-ài tsîng-lī
自彼日佮伊離開
tsū hit-ji̍t kah i lī-khui
辜負著伊好真義
koo-hū tio̍h i hó tsin-gī
放著伊暝日心稀微
pàng tio̍h i mî-ji̍t sim hi-bî
我雖然同情伊傷悲
guá sui-jiân tông-tsîng i siong-pi
我時常為伊傷悲
guá sî-siông uī i sim siong-pi
無辦法幫助著伊
bô pān-huat pang-tsōo tio̍h i
替伊傷悲啥路用
thè i siong-pi siánn lōo-iōng
連我也變成心稀微
liân guá iā piàn-sîng sim hi-bî
對面的彼个姑娘
tuì-bīn ê hit ê koo-niû
伊生做真正古錐
i senn-tsuè tsin-tsiànn kóo-tsui
為怎樣為著愛情
uī tsuánn-iūnn uī-tio̍h ài-tsîng
美麗青春受連累
bí-lē tshing-tshun siū liân-luí
怨嘆著命運流珠淚
uàn-thàn tio̍h miā-ūn lâu tsu-luī
我雖然為伊來吐氣
guá sui-jiân uī i lâi thóo-khuì
我暝日為伊吐氣
guá mî-ji̍t uī i thóo-khuì
伊毋知我的心情
i m̄-tsai guá ê sim-tsîng
替伊吐氣啥路用
thè i thóo-khuì siánn lōo-iōng
連我也強欲流珠淚
liân guá iā kiōng-beh lâu tsu-luī
