土公仔扛轎夫
《土公仔扛轎夫》Thóo-kong-á Kng-kiō-hu
石喬Tsio̍h-kiâu(石橋Tsio̍h-kiô)
——————————————
世情著愛看予透
sè-tsîng tio̍h-ài khuànn hōo thàu
奸雄的人毋通交
kan-hiông ê lâng m̄-thang kau
勸恁朋友好到老
khǹg lín pîng-iú hó kah lāu
賰錢是命人免𠢕
tshun-tsînn sī miā lâng bián gâu
世間富戶窒窒滇
sè-kan hù-hōo that-that tīnn
毋是人𠢕就賰錢
m̄-sī lâng gâu tiō tshun-tsînn
命歹看伊偌𠢕變
miā pháinn khuànn i guā gâu pìnn
𠢕人佇咧踢壁邊
gâu-lâng tī-leh that piah-pinn
未來出世命先註
buē lâi tshut-sì miā sing tsù
有的土公仔扛轎夫
ū-ê thóo-kong-á kng-kiō-hu
有的好額錢喝有
ū-ê hó-gia̍h tsînn hauh ū
𠢕人著共做軍師
gâu-lâng tio̍h kā tsuè kun-su
萬項是人的命運
bān-hāng sī lâng ê miā-ūn
毋是人𠢕錢就賰
m̄-sī lâng gâu tsînn tiō tshun
頇顢的毋煞免食睏
han-bān–ê m̄ suah bián tsia̍h-khùn
有的賰著降萬銀
ū-ê tshun tio̍h kàng bān gûn
做人毋通想私偏
tsuè-lâng m̄-thang siūnn su-phian
咱踮世間無幾年
lán tiàm sè-kan bô kuí-liân
人若欲死目一个𥍉
lâng nā beh-sí ba̍k tsi̍t-ê-nih
萬事佮人免相爭
bān-sū kah lâng bián sio-tsinn
心肝一人想一款
sim-kuann tsi̍t-lâng siūnn tsi̍t-khuán
海是上深天上懸
hái sī siōng tshim thinn siōng kuân
富戶艱苦免怨嘆
hù-hōo kan-khóo bián uàn-thàn
莫非這是千世冤
bo̍k-hui tse sī tshian-sè uan
有的出世有家伙
ū-ê tshut-sì ū ke-hé
兄弟無量起冤家
hiann-tī bô-liōng khí-uan-ke
想真做人若人客
siūnn-tsin tsuè-lâng ná lâng-kheh
死了江山換別人的
sí-liáu kang-san uānn pa̍t-lâng ê
著愛有道才得財
tio̍h-ài ū tō tsiah tit tsâi
做事毋通亂亂來
tsuè-sū m̄-thang luān-luān-lâi
事事項項較凊彩
sū-sū-hāng-hāng khah tshìn-tshái
聽我唱歌大發財
thiann guá tshiūnn-kua tuā huat-tsâi
