飄浪的愛
《飄浪的愛》Phiau-lōng ê Ài
方瑞娥Png Suī-ngôo
——————————————
為情愛走天涯
uī tsîng-ài tsáu thian-gâi
每日度苦過日子
muí-ji̍t tōo-khóo kè ji̍t-tsí
無論海角抑天邊
bô-lūn hái-kak ia̍h thinn-pinn
阮也欲來走揣你
gún iā bueh lâi tsáu-tshē lí
雖然你是飄撇的男兒
sui-jiân lí sī phiau-phiat ê lâm-jî
騙著阮的青春做你去
phiàn tio̍h gún ê tshing-tshun tsuè lí khì
並無來同情
pīng bô lâi tông-tsîng
薄命的女兒
po̍k-bīng ê lú-jî
引阮心酸珠淚滴
ín gún sim sng tsu-luī tih
到臺北夜都市
kàu Tâi-pak iā-too-tshī
五彩燈火閃閃爍
ngóo-tshái ting-hué siám-siám-sih
人山人海滿滿是
jîn-san jîn-hái muá-muá-sī
叫阮怎樣來揣起
kiò gún tsánn-iūnn lâi tshē-khí
雖然你是青春男兒
sui-jiân lí sī tshing-tshun lâm-jî
怎樣會來僥心做你去
tsánn-iūnn ē lâi hiau-sim tsuè lí khì
望欲來揣你
bāng bueh lâi tshuē lí
訴出阮心意
sòo tshut gún sim-ì
表示阮的真情義
piáu-sī gún ê tsin tsîng-gī
烏暗暝孤一个
oo-àm-mî koo tsi̍t-ê
徘徊路邊心稀微
pâi-huê lōo-pinn sim hi-bî
啥人欲來同情阮
siánn-lâng bueh lâi tông-tsîng gún
無依無倚的女兒
bô-i-bô-uá ê lú-jî
雖然你是英俊男兒
sui-jiân lí sī ing-tsùn lâm-jî
怎樣遐爾絕情做你去
tsánn-iūnn hiah-nī tsua̍t-tsîng tsuè lí khì
怨恨你無情
uàn-hūn lí bô-tsîng
害阮心哀悲
hāi gún sim ai-pi
毋知何時再相見
m̄-tsai hô-sî tsài sann-kìnn
