飛燕的祝福
《飛燕的祝福》Hui-iàn ê Tsiok-hok
丁麗燕Ting Lē-iàn
——————————————
天邊一群的飛燕
thinn-pinn tsi̍t-kûn ê hui-iàn
飛過異鄉山崙前
pue kuè ī-hiong suann-lūn tsîng
踮在宿舍小樓頂
tiàm tsāi sok-sià sió-lâu tíng
想起爸母的叮嚀
siūnn-khí pē-bú ê ting-lîng
離鄉背井心堅定
lî-hiong puē-tsínn sim kian-tīng
著愛奮鬥求光明
tio̍h-ài hùn-tàu kiû kong-bîng
飛燕啊飛燕啊
hui-iàn–ah hui-iàn–ah
請你為我來傳情
tshiánn lí uī guá lâi thuân-tsîng
故鄉飛燕
kòo-hiong hui-iàn
過著流浪的人生
kuè tio̍h liû-lōng ê jîn-sing
親像車輪轉無停
tshin-tshiūnn tshia-lián tsuán bô-thîng
只為將來好前程
tsí uī tsiong-lâi hó tsiân-tîng
為咱故鄉求光榮
uī lán kòo-hiong kiû kong-îng
他鄉外里來拍拚
thann-hiong guā-lí lâi phah-piànn
也有溫暖的人情
iā ū un-luán ê jîn-tsîng
飛燕啊飛燕啊
hui-iàn–ah hui-iàn–ah
請你為我來傳情
tshiánn lí uī guá lâi thuân-tsîng
故鄉飛燕
kòo-hiong hui-iàn
