望月寄相思
《望月寄相思》Bāng Gue̍h Kià Siunn-si
丁黛Ting Tāi
——————————————
自從郎君惜別後
tsū-tsiông lông-kun sioh-pia̍t āu
心情亂操操
sim-tsîng luān tshau-tshau
回想兩人情義厚
huê-sióng nn̄g-lâng tsîng-gī kāu
開聲強欲吼
khui-siann kiōng-beh háu
為著你我好日後
uī-tio̍h lí guá hó ji̍t-āu
出外去奮鬥
tshut-guā khì hùn-tàu
孤單賞月在門後
koo-tuann siúnn-ge̍h tsāi mn̂g-āu
暝日咧等候
mî-ji̍t teh tán-hāu
徛在談情舊所在
khiā tsāi tâm-tsîng kū sóo-tsāi
攑頭看月眉
gia̍h-thâu khuànn ge̍h-bâi
思念郎君心悲哀
su-liām lông-kun sim pi-ai
總是也無奈
tsóng–sī iā bô-nāi
向望成功倒轉來
ǹg-bāng sîng-kong tò-tńg–lâi
你我情原在
lí guá tsîng guân-tsāi
拜託月娘好安排
pài-thok ge̍h-niû hó an-pâi
完成好將來
uân-sîng hó tsiong-lâi
攑頭望月寄相思
gia̍h-thâu bāng ge̍h kià siunn-si
目屎掛目墘
ba̍k-sái kuà ba̍k-kînn
天頂月娘伴天星
thinn-tíng ge̍h-niû phuānn thinn-tshinn
天星閃爍爍
thinn-tshinn siám-sih-sih
望君保重守情義
bāng kun pó-tiōng siú tsîng-gī
毋通放袂記
m̄-thang pàng buē-kì
期待早日轉鄉里
kî-thāi tsá-ji̍t tńg hiunn-lí
閣再來團圓
koh-tsài lâi thuân-înn
