美麗的傷痕
《美麗的傷痕》Bí-lē ê Siong-hûn
麗小花Lē-sió-hue
——————————————
你是天邊的白雲
lí sī thinn-pinn ê pe̍h-hûn
自由自在
tsū-iû tsū-tsāi
心袂當安份
sim buē-tàng an-hūn
阮是暗淡的黃昏
gún sī àm-tām ê hông-hun
為你燒盡燦爛的青春
uī lí sio-tsīn tshàn-lān ê tshing-tshun
你親像漂流的船
lí tshin-tshiūnn phiau-liû ê tsûn
何時會想欲歇睏
hô-sî ē siūnn-beh hioh-khùn
阮親像燈塔的光
gún tshin-tshiūnn ting-thah ê kng
等候你暝日無分
tán-hāu lí mî-ji̍t bô-hun
毋願放開你我的情份
m̄-guān pàng-khui lí guá ê tsîng-hūn
貪戀暫時的溫馴
tham-luân tsiām-sî ê un-sûn
毋願閣再怨嘆
m̄-guān koh-tsài uàn-thàn
寂寞有偌長
tsi̍k-bo̍k ū guā tn̂g
愛遮疼
ài tsiah thiànn
按怎認份
án-tsuánn jīn-hūn
你是藏佇心內
lí sī tshàng tī sim-lāi
美麗的傷痕
bí-lē ê siong-hûn
回憶快樂
huê-ik khuài-lo̍k
等待換來心酸
tán-thāi uānn-lâi sim-sng
一寸寸
tsi̍t-tshùn-tshùn
你予我美麗的傷痕
lí hōo guá bí-lē ê siong-hûn
拍開心肝
phah-khui sim-kuann
才知影愛無賰
tsiah tsai-iánn ài bô tshun
