飼貓新手
《飼貓新手》Tshī-niau Sin-tshiú
蕭閎仁 Siau Hông-jîn
——————————————
我有一隻貓
guá ū tsi̍t-tsiah niau
伊逐工睏甲八點半
i ta̍k-kang khùn kah peh-tiám-puànn
若是我無起床
nā-sī guá bô khí-tshn̂g
伊嘛無愛起床
i mā bô-ài khí-tshn̂g
猶無逐家攏莫起床
iáu-bô ta̍k-ke lóng mài khí-tshn̂g
有一工竟然到十二點
ū-tsi̍t-kang kìng-jiân kah tsa̍p-jī-tiám
啊是咧佮我咧睏比賽喔
ah sī teh kah guá teh khùn pí-sài–ooh
這是啥物貓
tse sī siánn-mih niau
竟然比水閣較軟
kìng-jiân pí tsuí koh-khah nńg
對倒爿流過來
uì tò-pîng lâu–kuè-lâi
正爿流過去
tsiànn-pîng lâu–kuè-khì
對正爿躽過來
uì tsiànn-pîng nuà–kuè-lâi
倒爿踅出去
tò-pîng se̍h–tshut-khì
歡喜受氣的時陣
huann-hí siūnn-khì ê sî-tsūn
尾溜攏會變甲足大
bé-liu lóng ē piàn kah tsiok tuā
這是啥物貓
tse sī siánn-mih niau
哪會使遮長的時間
ná ē-sái tsiah tn̂g ê sî-kan
倒佇咧仝个所在
tó tī-leh kāng-ê sóo-tsāi
這是啥物貓
tse sī siánn-mih niau
竟然我竟然會飼白貓
kìng-jiân guá kìng-jiân ē tshī pe̍h-niau
上好莫買白色的厝
siōng-hó mài bé pe̍h-sik ê tshù
你會揣無你的白貓
lí ē tshuē-bô lí ê pe̍h-niau
上好莫買白色的厝
siōng-hó mài bé pe̍h-sik ê tshù
你會揣無你白色的貓
lí ē tshuē-bô lí pe̍h-sik ê niau
若是欲買白色的厝
nā-sī beh bé pe̍h-sik ê tshù
請你莫飼白貓
tshiánn lí mài tshī pe̍h-niau
喵~miau~
這是啥物貓
tse sī siánn-mih niau
是地球上媠的貓
sī tē-kiû siōng suí ê niau
這是啥物貓
tse sī siánn-mih niau
上愛走去上烏的所在
siōng ài tsáu-khì siōng oo ê sóo-tsāi
共家己舞甲若烏貓
kā ka-kī bú kah ná oo-niau
早起目睭是一條線
tsái-khí ba̍k-tsiu sī tsi̍t-tiâu suànn
逐工司奶司奶共你躽
ta̍k-kang sai-nai sai-nai kā lí nuà
若是欲飼白貓
nā-sī beh tshī pe̍h-niau
若是欲飼白貓
nā-sī beh tshī pe̍h-niau
若是欲飼白貓
nā-sī beh tshī pe̍h-niau
喔~若是欲飼白貓
ooh~ nā-sī beh tshī pe̍h-niau
你會是上特別的人
lí ē sī siōng ti̍k-pia̍t ê lâng
