阿母的手段
《阿母的手段》A-bú ê Tshiú-tuānn
鄭進一Tēnn Tsìn-it
——————————————
思念著故鄉的媽媽
su-liām tio̍h kòo-hiong ê má-mah
毋知阿母你會仔敢有寫
m̄-tsai a-bú lí huē-á kám ū siá
袂當踮你身邊
bē-tàng tiàm lí sin-pinn
我有拜託人探聽
guá ū pài-thok lâng thàm-thiann
你若標偌濟
lí nā pio guā-tsē
我是攏知影
guá sī lóng tsai-iánn
細漢時
sè-hàn-sî
爸爸的話我有聽
pá-pah ê uē guá ū thiann
伊講阿母你上𠢕揜私奇
i kóng a-bú lí siōng gâu iap sai-khia
媽媽請你毋通疼
má-mah tshiánn lí m̄-thang thiànn
毋通為錢心痛疼
m̄-thang uī tsînn sim thàng-thiànn
趕緊寄來
kuánn-kín kià–lâi
予我通好去佮人輸贏
hōo guá thang-hó khì kah lâng su-iânn
↓↓(口白)—(口白)—(口白)↓↓
大頭仔吾兒：
Tuā-thâu-á ngôo jî:
你的批阿母已經收著囉
lí ê phue a-bú í-king siu-tio̍h–looh
誠緊
tsiânn kín
你也已經入去關三年外
lí iā í-king ji̍p-khì kuainn sann-nî guā
上蓋安慰的是
siōng-kài an-uì–ê sī
你閣十外年
lí koh tsa̍p-guā nî
就會當倒轉來矣
tō ē-tàng tò-tńg–lâi–ah
啊今有影
ah tann ū-iánn
批內面
phue lāi-bīn
你共阿母講
lí kā a-bú kóng
你閣欠所費
lí koh khiàm sóo-huì
遐奇怪
hah kî-kuài
佇監獄內面
tī kàm-ga̍k lāi-bīn
食蹛穿一切攏公家的
tsia̍h, tuà, tshīng, it-tshè lóng kong-ka–ê
是按怎會欠錢用呢
sī-án-nuá ē khiàm tsînn īng–neh
今媽媽嘛無啥物私奇
tann má-mah mā bô-sánn-mih sai-khia
是欲按怎共你鬥相共
sī beh án-ánn kā lí tàu-sann-kāng
昨暝去共祖公仔拜拜的時陣
tsa-mê khì kā tsóo-kong-á pài-pài ê sî-tsūn
拄仔看著舊年
tú-á khuànn-tio̍h kū-nî
阿母簽六合彩
a-bú tshiam lio̍k-ha̍p-tshái
著三星
tio̍h sam-tshenn
謝神彼塊金牌啦
siā-sîn hit tè kim-pâi–lah
啊!你運氣誠好
ah! lí ūn-khì tsiânn hó
阿母今仔日將這塊金牌
a-bú kia̋nn-ji̍t tsiong tsit tè kim-pâi
提來去賣賣咧
the̍h lâi-khì bē-bē–leh
這條錢呢
tsit tiâu tsînn–neh
阿母這期閣共拚看覓咧
a-bú tsit kî koh kā piànn khuànn-māi–leh
若好運閣再著三星
nā hó-ūn koh-tsài tio̍h sam-tshenn
今媽媽的個性你也知影
tann má-mah ê kò-sìng lí iā tsai-iánn
濟的無啦
tsē–ê bô–lah
啊若少乎
ah nā tsió–honnh
嘛免講
mā bián-kóng
一切家己保重，乎
it-tshè ka-tī pó-tiōng, honnh
↑↑(口白)—(口白)—(口白)↑↑
想起著媽媽的手段
siūnn-khí tio̍h má-mah ê tshiú-tuānn
有時睏到半暝仔
ū sî khùn kah puànn-mé-á
嘛會著生驚
mā ē tio̍h-tshenn-kiann
定定叫我拍拚
tiānn-tiānn kiò guá phah-piànn
錢攏你咧領
tsînn lóng lí teh niá
問你賰偌濟
mn̄g lí tshun guā-tsē
你嘛講毋知影
lí mā kóng m̄ tsai-iánn
彼一日你提權狀
hit-tsi̍t-ji̍t lí the̍h khuân-tsn̄g
予我看
hōo guá khuànn
阿母
a-bú
才知這間厝
tsiah tsai tsit king tshù
你早就登記
lí tsá tiō ting-kì
我的名
guá ê miâ
媽媽
má-mah–uê
請你毋通疼
tshiánn lí m̄-thang thiànn
毋通為我心痛疼
m̄-thang uī guá sim thàng-thiànn
有一日我會創造好名聲
ū-tsi̍t-ji̍t guá ē tshòng-tsō hó miâ-siann
