阿母哪會攏無睏
《阿母哪會攏無睏》A-bú Ná Ē Lóng Bô Khùn
蔡宜汝Tshuà Gî-jú
——————————————
昨暝我欲睏的時陣
tsa-mî guá beh khùn ê sî-tsūn
阿母猶未睏
a-bú iáu-buē khùn
透早我目睭擘金
thàu-tsá guá ba̍k-tsiu peh-kim
阿母已經咧煮早頓
a-bú í-king teh tsú tsá-tǹg
奇怪阿母哪會攏無睏
kî-kuài a-bú ná ē lóng bô khùn
想起離開故鄉彼時陣
siūnn-khí lī-khui kòo-hiong hit-sî-tsūn
阿母提所費予阮
a-bú the̍h sóo-huì hōo gún
教阮出外愛有分寸
kà gún tshut-guā ài ū hun-tshùn
著愛好喙佮人相借問
tio̍h-ài hó-tshuì kah lâng sio-tsioh-mn̄g
伊目箍紅紅
i ba̍k-khoo âng-âng
目屎腹內吞
ba̍k-sái pak-lāi thun
伊講煩惱甲規暝攏無睏
i kóng huân-ló kah kui-mî lóng bô khùn
阿母哪會攏無睏
a-bú ná ē lóng bô khùn
阿母哪會攏無睏
a-bú ná ē lóng bô khùn
頭路愈無閒
thâu-lōo jú bô-îng
故鄉的路愈遠
kòo-hiong ê lōo jú hn̄g
今仔日阿母講欲看孫
kin-á-ji̍t a-bú kóng beh khuànn sun
我看伊
guá khuànn i
頭毛白白
thâu-mn̂g pe̍h-pe̍h
目尾皺皺
ba̍k-bué jiâu-jiâu
喙角笑吻吻
tshuì-kak tshiò bún-bún
伊講歡喜甲規暝攏無睏
i kóng huann-hí kah kui-mî lóng bô khùn
阿母哪會攏無睏
a-bú ná ē lóng bô khùn
