花蕊的命運
《花蕊的命運》Hue-luí ê Miā-ūn
鄭琇月Tēnn Siù-gua̍t
——————————————
毋管風雨怎樣吹
m̄-kuán hong-hōo tsuánn-iūnn tshue
小小花蕊毋願墜落地
sió-sió hue-luí m̄-guān tuī lo̍h-tē
遐爾勇敢
hiah-nī ióng-kám
遐爾美麗
hiah-nī bí-lē
予我來心痴迷
hōo guá lâi sim tshi-bê
請你對我
tshiánn lí tuì guá
說明你的身世
suat-bîng lí ê sin-sè
我欲了解你的一切
guá beh liáu-kái lí ê it-tshè
有啥物心內話
ū siánn-mih sim-lāi uē
請你講詳細
tshiánn lí kóng siông-sè
互相來鼓勵
hōo-siong lâi kóo-lē
互相來解決問題
hōo-siong lâi kái-kuat būn-tuê
