舞女心聲
《舞女心聲》Bú-lú Sim-siann
鄭琇月Tēnn Siù-gua̍t
——————————————
阮是薄命的孤女
gún sī po̍k-bīng ê koo-lí
為著環境來到夜都市
uī-tio̍h khuân-kíng lâi-kàu iā too-tshī
向望成功回鄉里
ǹg-bāng sîng-kong huê hiunn-lí
誰知受人欺騙落舞池
siáng tsai siū lâng khi-phiàn lo̍h bú-tî
五色燈光閃閃爍
ngóo-sik ting-kng siám-siám-sih
音樂伴奏予人情綿綿
im-ga̍k phuānn-tsàu hōo lâng tsîng mî-mî
看阮喙笑其實心哀悲
khuànn gún tshuì tshiò kî-si̍t sim ai pi
希望舞客有情意
hi-bāng bú-kheh ū tsîng-ì
救阮脫離烏暗的火坑
kiù gún thuat-lî oo-àm ê hué-khinn
自從佮你來熟似
tsū-tsiông kah lí lâi si̍k-sāi
看著你的做人真慷慨
khuànn-tio̍h lí ê tsuè-lâng tsin khóng-khài
出場上場一直開
tshut-tiûnn tsiūnn-tiûnn it-ti̍t khai
予我對你真情佮真愛
hōo guá tuì lí tsin-tsîng kah tsin-ài
離開舞廳入家內
lī-khui bú-thiann ji̍p ka-lāi
將你當做體貼的翁婿
tsiong lí tòng-tsuè thé-thiap ê ang-sài
無疑你是假情佮假愛
bô-gî lí sī ké-tsîng kah ké-ài
予阮傷心流目屎
hōo gún siong-sim lâu ba̍k-sái
舞女運命哪會遮爾䆀
bú-lú ūn-miā ná ē tsiah-nī bái
