臺北有啥稀奇
《臺北有啥稀奇》Tâi-pak Ū Siánn Hi-kî
錢愛真Tsînn Ài-tsin
——————————————
臺北是雖然繁華都市
Tâi-pak sī sui-jiân huân-huâ too-tshī
毋過蹛了無趣味
m̄-koh tuà liáu bô tshù-bī
汽車機車
khì-tshia ki-tshia
衝來衝去
tshiong-lâi-tshiong-khì
無守交通的規矩
bô siú kau-thong ê kui-kí
阮是一个田庄女兒
gún sī tsi̍t-ê tshân-tsng lú-jî
也無親人在身邊
iā bô tshin-lâng tsāi sin-pinn
想欲來追求名利
siūnn-bueh lâi tui-kiû miâ-lī
恐驚無容易
khióng-kiann bô iông-ī
臺北市無啥稀奇
Tâi-pak-tshī bô-siánn hi-kî
看破轉來去
khuànn-phuà tńg–lâi-khì
臺北市暗暝燈光閃爍
Tâi-pak-tshī àm-mî ting-kng siám-sih
毋過蹛了無趣味
m̄-koh tuà liáu bô tshù-bī
聽人講起
thiann lâng kóng-khí
迷人暗暝
bê-lâng àm-mî
墮落真濟的少女
tuī-lo̍h tsin tsuē ê siàu-lí
阮是一个田庄女兒
gún sī tsi̍t-ê tshân-tsng lú-jî
也無朋友在身邊
iā bô pîng-iú tsāi sin-pinn
黃昏時孤單一个
hông-hun sî koo-tuann tsi̍t-ê
感覺真稀微
kám-kak tsin hi-bî
臺北市無啥稀奇
Tâi-pak-tshī bô-siánn hi-kî
看破轉來去
khuànn-phuà tńg–lâi-khì
臺北是雖然首都城市
Tâi-pak sī sui-jiân siú-too siânn-tshī
毋過蹛了無趣味
m̄-koh tuà liáu bô tshù-bī
阮彼个人
gún hit ê lâng
搬來搬去
puann-lâi-puann-khì
予阮揣無伊住址
hōo gún tshuē-bô i tsū-tsí
阮是一个田庄女兒
gún sī tsi̍t-ê tshân-tsng lú-jî
毋知何處去揣伊
m̄-tsai hô-tshù khì tshuē i
伊敢是薄情薄義
i kám-sī po̍k-tsîng po̍k-gī
將阮放袂記
tsiong gún pàng-buē-kì
臺北市無啥稀奇
Tâi-pak-tshī bô-siánn hi-kî
看破轉來去
khuànn-phuà tńg–lâi-khì
