無天光彼日
《無天光彼日》Bô Thinn Kng Hit-ji̍t
賴慧如Luā Huī-jû
——————————————
自頭仔
tsū-thâu-á
咱兩人有約定
lán nn̄g-lâng ū iok-tiānn
至尾矣
tsì-bué–ah
賰阮一雙箸
tshun gún tsi̍t-siang tī
怪家己愛了傷深
kuài ka-kī ài liáu siunn tshim
才會傷甲拆心裂肺
tsiah-ē siong kah thiah-sim li̍h-hì
前路看袂清
tsîng-lōo khuànn buē-tshing
越頭無底深坑
ua̍t-thâu bô-té tshim-khinn
阮佇烏暗中浮沉
gún tī oo-àm tiong phû-tîm
連喘氣都需要勇氣
liân tshuán-khuì to su-iàu ióng-khì
阮嘛是有向望
gún mā sī ū ǹg-bāng
彼片光明
hit phìnn kong-bîng
只是阮愈想欲清醒
tsí-sī gún jú siūnn-beh tshing-tshínn
記持就愈刁持
kì-tî tiō jú thiau-tî
心內的雨無停
sim-lāi ê hōo bô thîng
恬恬落規暝
tiām-tiām lo̍h kui-mî
據在目屎飽滇
kì-tsāi ba̍k-sái pá-tīnn
駐死阮魂魄
tū-sí gún hûn-phik
過去的一點一滴
kuè-khì ê tsi̍t-tiám-tsi̍t-tih
無情豉過阮空喙
bô-tsîng sīnn kuè gún khang-tshuì
是苦是疼是傷悲
sī khóo sī thiànn sī siong-pi
有一日總會慣勢
ū-tsi̍t-ji̍t tsóng ē kuàn-sì
敢會當予我的人生
kám ē-tàng hōo guá ê jîn-sing
就到遮止
tiō kàu tsia tsí
橫直阮無愛無恨
huâinn-ti̍t gún bô ài bô hūn
無人掛意
bô-lâng kuà-ì
這世人
tsit-sì-lâng
等無天光彼日
tán-bô thinn kng hit-ji̍t
