水中仙
《水中仙》Tsuí-tiong Sian
鄭智仁Tēnn Tì-jîn
詹喆君Tsiam Tiat-kun(?)
——————————————
探頭出來看世界
thàm-thâu tshut-lâi khuànn sè-kài
充滿夢想佮期待
tshiong-buán bāng-sióng kah kî-thāi
安然自在好風采
an-jiân tsū-tsāi hó hong-tshái
恬恬出世歡喜來
tiām-tiām tshut-sì huann-hí lâi
二八青春花一枝
jī-pat tshing-tshun hue tsi̍t-ki
正當拍莓花開時
tsiànn tng phah-m̂ hue khui sî
天生麗質若仙女
thian-sing lê-tsit ná sian-lí
清心快樂唸歌詩
tshing-sim khuài-lo̍k liām kua-si
一花一葉一世界
tsi̍t hue tsi̍t hio̍h tsi̍t sè-kài
大自然是巧安排
tuā-tsū-jiân sī khá an-pâi
互相照顧佮關懷
hōo-siong tsiàu-kòo kah kuan-huâi
毋驚日曝抑雨來
m̄-kiann ji̍t pha̍k ia̍h hōo lâi
不染污泥水中仙
put jiám u-nî tsuí-tiong sian
詩人墨客吟愛蓮
si-jîn ba̍k-kheh gîm ài-lián
無聲說法立大千
bô-siann sueh-huat li̍p tāi-tshian
一片淨土在心田
it-phiàn tsīng-thóo tsāi sim-tiân
