東石港的戀歌
《東石港的戀歌》Tang-tsio̍h-káng ê Luân-kua
蔡一州Tshuà It-tsiu
——————————————
離開故鄉
lī-khui kòo-hiong
出外咧拍拚
tshut-guā teh phah-piànn
拄著困難
tú-tio̍h khùn-lân
心袂驚
sim buē kiann
希望有一工
hi-bāng ū-tsi̍t-kang
會當蓋奢颺
ē-tàng kài tshia-iānn
親像滿載入港的船隻
tshin-tshiūnn buán-tsài ji̍p-káng ê tsûn-tsiah
竹棑仔頂的蚵仔攀
tik-pâi-á tíng ê ô-á-phan
船仔頭的紅樹林
tsûn-á-thâu ê âng-tshiū-nâ
岸邊有白翎鷥咧唱歌
huānn-pinn ū pe̍h-līng-si teh tshiùnn-kua
遮爾媠的東石港岸
tsiah-nī suí ê Tang-tsio̍h-káng huānn
有心愛的咧等我
ū sim-ài–ê teh tán guá
有心愛的咧等我
ū sim-ài–ê teh tán guá
啊~懷念的東石港
ah~ huâi-liām ê Tang-tsio̍h-káng
愛人仔的形影
ài-jîn-á ê hîng-iánn
破蚵仔所唱的彼條戀歌
phuà ô-á sóo tshiùnn ê hit tiâu luân-kua
