月夜小路
《月夜小路》Gue̍h-iā Sió-lōo
鄭琇月Tēnn Siù-gua̍t
——————————————
盈暗月色特別青
tîng-àm ge̍h-sik ti̍k-pia̍t tshinn
最好彎路轉來去
tsuè hó uan-lōo tńg–lâi-khì
順著彼條小路邊
sūn tio̍h hit tiâu sió-lōo pinn
想咱彼當時
siūnn lán hit-tong-sî
初次相逢好日子
tshoo-tshù siong-hông hó ji̍t-tsí
你我相牽趁月暝
lí guá sio-khan thàn ge̍h-mî
溫暖著好情義
un-luán tio̍h hó tsîng-gī
散步轉來去
sàn-pōo tńg–lâi-khì
盈暗月娘有誠意
tîng-àm ge̍h-niû ū-sîng-ì
咱就彎路轉來去
lán tiō uan-lōo tńg–lâi-khì
順著彼條小路邊
sūn tio̍h hit tiâu sió-lōo pinn
表示青春時
piáu-sī tshing-tshun sî
雙人熱戀情綿綿
siang-lâng jia̍t-luân tsîng mî-mî
深更可愛風微微
tshim-kinn khó-ài hong bî-bî
保持著糖蜜甜
pó-tshî tio̍h thn̂g-bi̍t-tinn
散步轉來去
sàn-pōo tńg–lâi-khì
盈暗月影帶潤味
tîng-àm ge̍h-iánn tài jūn-bī
猶原彎路轉來去
iu-guân uan-lōo tńg–lâi-khì
順著彼條小路邊
sūn tio̍h hit tiâu sió-lōo pinn
懷念咱情意
huâi-liām lán tsîng-ì
雖然無奈愛分離
sui-jiân bô-nāi ài hun-lî
最後一次我伴你
tsuè-āu tsi̍t-tshù guá phuānn lí
記念著快樂時
kì-liām tio̍h khuài-lo̍k sî
散步轉來去
sàn-pōo tńg–lâi-khì
