離鄉
《離鄉》Lî-hiong
臺北室內合唱團Tâi-pak Sik-lāi Ha̍p-tshiùnn-thuân
——————————————
細漢的時陣
sè-hàn ê sî-tsūn
干焦想欲出去飛
kan-na siūnn-beh tshut-khì pue
想著外頭的世界
siūnn-tio̍h guā-thâu ê sè-kài
是遐爾仔大
sī hiah-nī-á tuā
大漢了後
tuā-hàn liáu-āu
轉來我的故鄉
tńg-lâi guá ê kòo-hiong
想著過去的感覺
siūnn-tio̍h kuè-khì ê kám-kak
猶是遐爾仔甜美
iáu-sī hiah-nī-á tinn-bí
離開故鄉來到異鄉
lī-khui kòo-hiong lâi kàu ī-hiong
無閣熟似的一切
bô koh si̍k-sāi ê it-tshè
是遐爾仔無簡單
sī hiah-nī-á bô kán-tan
經過遮風風雨雨
king-kuè tsia hong-hong-ú-ú
爸母的疼惜
pē-bú ê thiànn-sioh
才知是上溫暖
tsiah tsai sī siōng un-luán
阿爸阿母
a-pa a-bú
請你原諒我到異鄉拍拚
tshiánn lí guân-liōng guá kàu ī-hiong phah-piànn
為著較好的生活
uī-tio̍h khah hó ê sing-ua̍h
食苦當做咧食補
tsia̍h-khóo tòng-tsò teh tsia̍h-póo
阿爸阿母
a-pa a-bú
感謝恁對我的疼惜照顧
kám-siā lín tuì guá ê thiànn-sioh tsiàu-kòo
若是閣予我一擺機會
nā-sī koh hōo guá tsi̍t-pái ki-huē
我仝款會選擇自由去飛
guá kāng-khuán ē suán-ti̍k tsū-iû khì pue
