有夢上媠

《有夢上媠》Ū Bāng Siōng Suí
詹宏達Tsiam Hông-ta̍t
——————————————
陣陣春雨若甘露
tsūn-tsūn tshun-hōo ná kam-lōo
萬物暴穎得照顧
bān-bu̍t pok-ínn tit tsiàu-kòo
春光燦爛鋪大路
tshun-kong tshàn-lān phoo tuā-lōo
跤步前後相招呼
kha-pōo tsîng-āu sio tsio-hoo
行過歷史的牆圍
kiânn kuè li̍k-sú ê tshiûnn-uî
步步向前春花開
pōo-pōo hiòng-tsîng tshun-hue khui
有夢的人上蓋媠
ū bāng ê lâng siōng-kài suí
希望永遠伴相隨
hi-bāng íng-uán phuānn sio-suî
起心為著好所在
khí-sim uī-tio̍h hó sóo-tsāi
尊嚴自在傳百代
tsun-giâm tsū-tsāi thuân pah-tāi
伸手探望咱將來
tshun-tshiú thàm-bāng lán tsiong-lâi
溫溫燒燒佇心內
un-un-sio-sio tī sim-lāi
行過歷史的牆圍
kiânn kuè li̍k-sú ê tshiûnn-uî
步步向前春花開
pōo-pōo hiòng-tsîng tshun-hue khui
有夢的人上蓋媠
ū bāng ê lâng siōng-kài suí
希望永遠伴相隨
hi-bāng íng-uán phuānn sio-suî
夢佇窗口咧閃爍
bāng tī thang-kháu teh siám-sih
照著將來照家己
tsiò tio̍h tsiong-lâi tsiò ka-kī
珍惜揣夢的日子
tin-sioh tshuē bāng ê ji̍t-tsí
毋通躊躇行落去
m̄-thang tiû-tû kiânn–lo̍h-khì
行過歷史的牆圍
kiânn kuè li̍k-sú ê tshiûnn-uî
步步向前春花開
pōo-pōo hiòng-tsîng tshun-hue khui
有夢的人上蓋媠
ū bāng ê lâng siōng-kài suí
希望永遠伴相隨
hi-bāng íng-uán phuānn sio-suî

您可能也會喜歡…

跳至工具列