天總是攏會光
《天總是攏會光》Thinn Tsóng–sī Lóng Ē Kng
詹喆君Tsiam Tiat-kun
——————————————
在阮熄燈的前彼時
tsāi gún sit-ting ê tsîng hit-sî
外面一陣冷冷的風
guā-bīn tsi̍t-tsūn líng-líng ê hong
孤獨的形影
koo-to̍k ê hîng-iánn
閣出現眼前
koh tshut-hiān gán-tsîng
彼段心酸的無奈時
hit tuānn sim sng ê bô-nāi sî
親像佇天邊的流星
tshin-tshiūnn tī thinn-pinn ê liû-tshinn
予人會數念的流浪代誌
hōo-lâng ē siàu-liām ê liû-lōng tāi-tsì
流浪代誌
liû-lōng tāi-tsì
猶原是堅定的熱情
iu-guân sī kian-tīng ê jia̍t-tsîng
永遠是疼痛的心情
íng-uán sī thiànn-thàng ê sim-tsîng
伊定定講
i tshiānn kóng
相信暝是袂久長
siong-sìn mî sī buē kú-tn̂g
雷公風雨的暝以後
luî-kong hong-hōo ê mî í-āu
看見番薯落地生根
khuànn-kìnn han-tsû lo̍h-tē sing kin
伊定定講
i tshiānn kóng
相信天總是會光
siong-sìn thinn tsóng–sī ē kng
總是會光
tsóng–sī ē kng
窗外是長夜無邊
thang-guā sī tn̂g-iā bô-pinn
掩映的是悲歡的歲月
am-ìng–ê sī pi-huan ê suè-gua̍t
雖然暗暝是遮爾久長
sui-jiân àm-mî sī tsiah-nī kú-tn̂g
但是
tān-sī
天總是攏會光
thinn tsóng–sī lóng ē kng
