毋成囝
《毋成囝》M̄-tsiânn-kiánn
楊肅浩Iûnn Siok-hō
——————————————
毋是每一間厝
m̄-sī muí tsi̍t-king tshù
攏有溫暖的眠床
lóng ū un-luán ê bîn-tshn̂g
親像伊定定等門
tshin-tshiūnn i tiānn-tiānn tán mn̂g
等無爸母顧三頓
tán-bô pē-bú kòo-sann-tǹg
毋是飄撇愛虛華
m̄-sī phiau-phiat ài hi-hua
只是安全感佇佗
tsí-sī an-tsuân-kám tī tah
嘛想欲做人的依倚
mā siūnn-beh tsò lâng ê i-uá
幾段感情真緊就煞
kuí-tuānn kám-tsîng tsin kín tiō suah
成長的路行到遮
sîng-tióng ê lōo kiânn kah tsia
人攏講伊是毋成囝
lâng lóng kóng i sī m̄-tsiânn-kiánn
欲行去佗
beh kiânn khì tah
一夜一夜
tsi̍t-iā-tsi̍t-iā
反袂起身的生活
píng buē khí-sin ê sing-ua̍h
無人疼的囡仔
bô-lâng thiànn ê gín-á
帶愛的八字按怎寫
tuà ài ê pueh-jī án-tsuánn siá
連一个遮風避雨的家
liân tsi̍t-ê jia-hong phiah-hōo ê ke
攏毋知生做啥
lóng m̄-tsai senn-tsò siánn
伊的青春有塗沙
i ê tshing-tshun ū thôo-sua
沐著雨水就變荏懶
bak-tio̍h hōo-tsuí tiō piàn lám-nuā
漸漸行向烏暗路的
tsiām-tsiām kiânn hiòng oo-àm-lōo ê
毋成囝
m̄-tsiânn-kiánn
伊若拍開厝內的門
i nā phah-khui tshù-lāi ê mn̂g
看著成長的傷痕
khuànn-tio̍h sîng-tióng ê siong-hûn
偌濟傷痕變怨恨
guā-tsē siong-hûn piàn uàn-hūn
鑽入心肝無地囥
tsǹg-ji̍p sim-kuann bô-tè khǹg
袂癮予別人踏塗跤
buē-giàn hōo pa̍t-lâng ta̍h thôo-kha
轉踅甲心內變空營
tńg-se̍h kah sim-lāi piàn khang-iânn
認幾个阿兄欲趁食
jīn kuí-ê a-hiann beh thàn-tsia̍h
偌濟是嘐潲的咒誓
guā-tsē sī hau-siâu ê tsiù-tsuā
拍翸的路行到遮
phah-phún ê lōo kiânn kàu tsia
有幾个鬥陣的無變卦
ū kuí-ê tàu-tīn–ê bô piàn-kuà
心愛偌勇健
sim ài guā ióng-kiānn
目屎流焦
ba̍k-sái lâu ta
才發覺怨恨無較縒
tsiah huat-kak uàn-hūn bô-khah-tsua̍h
無人疼的囡仔
bô-lâng thiànn ê gín-á
帶愛的八字無算啥
tuà ài ê pueh-jī bô-sǹg siánn
大漢的時間按怎變化
tuā-hàn ê sî-kan án-tsuánn piàn-huà
無人講會定
bô-lâng kóng ē-tiānn
若是青春有塗沙
nā sī tshing-tshun ū thôo-sua
予風吹過就變坱埃
hōo hong tshue–kuè tiō piàn ing-ia
有偌濟光的所在
ū guā-tsuē kng ê sóo-tsāi
有偌濟烏影
ū guā-tsuē oo-iánn
無人疼的囡仔
bô-lâng thiànn ê gín-á
帶愛的八字無算啥
tuài ài ê pueh-jī bô-sǹg siánn
大漢的時間按怎變化
tuā-hàn ê sî-kan án-tsuánn piàn-huà
無人講會定
bô-lâng kóng ē-tiānn
若是青春有塗沙
nā sī tshing-tshun ū thôo-sua
予風吹過就變坱埃
hōo hong tshue–kuè tiō piàn ing-ia
有偌濟光的所在
ū guā-tsē kng ê sóo-tsāi
有偌濟烏影
ū guā-tsē oo-iánn
若是每一个人
nā sī muí tsi̍t-ê lâng
攏有成長的傷痕
lóng ū sîng-tióng ê siong-hûn
偌濟傷痕變養份
guā-tsē siong-hûn piàn ióng-hūn
毋是隨時通按算
m̄-sī suî-sî thang àn-sǹg
偌深的無奈佮孤單
guā tshim ê bô-nāi kah koo-tuann
坎坷的路毋捌好行
khám-khia̍t ê lōo m̄-bat hó-kiânn
是毋是越頭斟酌看
sī-m̄-sī ua̍t-thâu tsim-tsiok khuànn
猶有人點著燈火佇遐
iáu ū-lâng tiám tio̍h ting-hué tī hia
