《忍》Jím
黃俊雄N̂g Tsùn-hiông
——————————————
討厭浪漫的境界
thó-ià lōng-bān ê kíng-kài
跳出了苦海
thiàu-tshut liáu khóo-hái
無疑狂風暴雨來
bô-gî kông-hong pō-ú lâi
使阮心悲哀
sú gún sim pi-ai
拋棄性命佮戀愛
phau-khì sìnn-miā kah luân-ài
想欲再墜海
siūnn-bueh tsài tuī hái
展出男子的氣概
tián-tshut lâm-tsú ê khì-khài
艱苦強忍耐
kan-khóo kiông jím-nāi
人生渺渺又茫茫
jîn-sing biáu-biáu iū bâng-bâng
可比一場夢
khó-pí tsi̍t-tiûnn bāng
為著欲當男子漢
uī-tio̍h bueh tong lâm-tsú-hàn
為著做好人
uī-tio̍h tsuè hó-lâng
千辛萬苦無怨嘆
tshian-sin bān-khóo bô uàn-thàn
想欲達希望
siūnn-bueh ta̍t hi-bāng
無疑人情遮冷淡
bô-gî jîn-tsîng tsiah líng-tām
變成無情夢
piàn-sîng bô-tsîng bāng
轉眼光陰過得快
tsuán-gán kong-im kuè tit khuài
春去秋轉來
tshun khì tshiu tńg–lâi
昨日歡喜談戀愛
tsa-ji̍t huann-hí tâm luân-ài
今日又悲哀
kim-ji̍t iū pi-ai
為著真愛走天涯
uī-tio̍h tsin-ài tsáu thian-gâi
無人會了解
bô-lâng ē liáu-kái
這款現實的世界
tsit khuán hiān-si̍t ê sè-kài
君子著忍耐
kun-tsú tio̍h jím-nāi

You may also like...

Skip to toolbar