阿爸的雙手
《阿爸的雙手》A-pah ê Siang-tshiú
陳美玲Tân-bí-lîng(亞忻A-him)
——————————————
世間上蓋孤單
sè-kan siōng-kài koo-tuann
寂寞是阿爸
tsi̍k-bo̍k sī a-pah
親像一座山
tshin-tshiūnn tsi̍t-tsō suann
恬恬徛佇遐
tiām-tiām khiā tī hia
上歹了解你心肝
siōng pháinn liáu-kái lí sim-kuann
定定恬恬毋出聲
tiānn-tiānn tiām-tiām m̄ tshut-siann
爸爸是阮的靠山
pá-pah sī gún ê khò-suann
共阮擋風寒
kā gún tòng hong-kuânn
粗皮的雙手
tshoo-phuê ê siang-tshiú
毋驚日頭赤焱焱
m̄-kiann ji̍t-thâu tshiah-iānn-iānn
每工風吹雨淋
muí-kang hong tshue hōo lâm
四界去拍拚
sì-kè khì phah-piànn
少年懵懂袂曉想
siàu-liân bóng-tóng buē-hiáu siūnn
你講過的話
lí kóng–kuè ê uē
我無聽
guá bô thiann
如今才知影
jû-kim tsiah tsai-iánn
路歹行
lōo pháinn-kiânn
我會認真去拍拚
guá ē jīn-tsin khì phah-piànn
報答你艱苦共阮晟
pò-tap lí kan-khóo kā gún tshiânn
