為伊流浪千萬里
《為伊流浪千萬里》Uī I Liû-lōng Tshian-bān-lí
游小鳳Iû Sió-hōng
——————————————
秋風微微帶悲意
tshiu-hong bî-bî tài pi-ì
今夜雺霧罩四邊
kim-iā bông-bū tà sì-pinn
時刻已經到三更
sî-khik í-king kàu sann-kinn
猶原無看見著你
iu-guân bô khuànn-kìnn tio̍h lí
心愛的人佗位去
sim-ài ê lâng tó-uī khì
害阮規暝睏袂去
hāi gún kui-mî khùn buē-khì
雖然你來佮我分開
sui-jiân lí lâi kah guá hun-khui
心內較想也是你
sim-lāi khah siūnn iā-sī lí
月娘請你來指示
gue̍h-niû tshiánn lí lâi tsí-sī
毋通予阮費心機
m̄-thang hōo gún huì sim-ki
一暝過了又一暝
tsi̍t-mî kuè-liáu iū tsi̍t-mî
心頭較想也是你
sim-thâu khah siūnn iā-sī lí
為欲揣著心愛你
uī-beh tshē-tio̍h sim-ài lí
離開爸母的身邊
lī khui pē-bú ê sin-pinn
心愛的人佗位去
sim-ài ê lâng tó-uī khì
為你流浪千萬里
uī lí liû-lōng tshian-bān-lí
看著別人雙雙對對
khuànn-tio̍h pa̍t-lâng siang-siang tuì-tuì
綿綿情話動阮耳
mî-mî tsîng-uē tāng gún hīnn
忍著滿腹酸苦味
jím-tio̍h muá-pak sng-khóo-bī
猶原欲來走揣你
iu-guân bueh lâi tsáu-tshuē lí
