水仙倚溪水
《水仙倚溪水》Tsuí-sian Uá Khe-tsuí
張秀卿Tiunn Siù-khing
——————————————
踮你的身邊
tiàm lí ê sin-pinn
看你無閒來無閒去
khuànn lí bô-îng lâi bô-îng khì
等你會來輕聲細語
tán lí ē lâi khin-siann sè-gí
叫阮的名字
kiò gún ê miâ-jī
若水仙無水
ná tsuí-sian bô tsuí
阮的愛情
gún ê ài-tsîng
無伊袂發穎
bô i buē huat-ínn
只有每日抱著相思
tsí-ū muí-ji̍t phō tio̍h siunn-si
臆伊心情過日子
ioh i sim-tsiânn kuè ji̍t-tsí
毋知這陣的你
m̄-tsai tsit-tsūn ê lí
敢有聽見
kám ū thiann-kìnn
阮心跳甲遮稀微
gún sim thiàu kah tsiah hi-bî
聲聲攏咧提醒
siann-siann lóng teh thê-tshínn
生活若無你
sing-ua̍h nā bô lí
全然無滋又無味
tsuân-jiân bô-tsu iū bô-bī
到底愛阮偌爾痴情對你
tàu-té ài gún guā-nī tshi-tsîng tuì lí
才會換你情綿綿
tsiah ē uānn lí tsîng mî-mî
予阮隨時揣有你
hōo gún suî-sî tshuē-ū lí
目睭內遮爾愛你
ba̍k-tsiu-lāi tsiah-nī ài lí
愛你的自己
ài lí ê tsū-kí
註定一生頭敧敧
tsù-tiānn it-sing thâu khi-khi
綴你歡喜佮傷悲
tuè lí huann-hí kah siong-pi
為你開為你媠
uī lí khui uī lí suí
親像水仙倚溪水
tshin-tshiūnn tsuí-sian uá khe-tsuí
為你開為你媠
uī lí khui uī lí suí
親像水仙倚溪水
tshin-tshiūnn tsuí-sian uá khe-tsuí
