極樂金花
《極樂金花》Ki̍k-lo̍k Kim-hue
珂拉琪Kho-la-kî
——————————————
彼佛國土
pí Hu̍t kok-thóo
常做天樂
tsiông tsò thian-ga̍k
黃金為地
hông-kim uî tē
晝夜六時
tiù-iā lio̍k-sî
雨天曼陀羅華
ú-thian bān-tôo-lô-huâ
–
離開的彼工
lī-khui ê hit-kang
雄雄看著彼个城
hiông-hiông khuànn-tio̍h hit ê siânn
金花搖規暝
kim-hue iô kui-mê
毋知敢是迷戀
m̄-tsai kám-sī bê-luân
對塗內起去
tuì thôo lāi peh–khí-khì
四界爬啊爬袂停
sì-kè pê–ah pê bē-thîng
幼骨伸手探血池
iù-kut tshun-tshiú thàm hueh-tî
想無進前佇佗位
siūnn-bô tsìn-tsîng tī tó-uī
重新閣開始
tiông-sin koh khai-sí
這改袂予人買去
tsit kái bē hōo-lâng bé–khì
小可仔袂慣勢
sió-khuá-á bē kuàn-sì
迒過生份身屍
hānn kuè tshenn-hūn sin-si
戇戇佇遐照鏡
gōng-gōng tshāi tī hia tsiò-kiànn
花血紅顏
hue-hiat hông-gân
驚邪風又閣吹來
kiann siâ-hong iū-koh tshue–lâi
隨倒頭栽
suî tò-thâu-tsai
認真感受戀愛
jīn-tsin kám-siū luân-ài
佮學習智識
kah ha̍k-si̍p tì-sik
糊塗拍算未來
hôo-tôo phah-sǹg bī-lâi
無定會當生成人
bô-tiānn ē-tàng senn sîng lâng
每一工
muí tsi̍t-kang
行佇紅磚仔路
kiânn tī âng-tsng-á-lōo
下暗城市
e-àm siânn-tshī
霓虹伴落雨
nê-hông phuānn lo̍h-hōo
人海中
jîn-hái tiong
相挨相𤲍拑牢伊的衫
sio-e sio-kheh khînn-tiâu i ê sann
若傳說沃澹我的名
nā thuân-suat ak-tâm guá ê miâ
我只想欲全心共你承咧
guá tsí siūnn-beh tsuân-sim kā lí sîn–leh
細粒的目睭貯大夢
sè-lia̍p ê ba̍k-tsiu té tuā bāng
門開一點仔
mn̂g khui tsi̍t-tiám-á
看著神祕的未來
khuànn-tio̍h sîn-pì ê bī-lâi
彼爿閃爍閣迷人
hit-pîng siám-sih koh bê-lâng
恬恬講袂出聲
tiām-tiām kóng bē tshut-siann
想東閣想西
siūnn tang koh siūnn sai
想欲逐著彼个影
siūnn-beh jiok tio̍h hit ê iánn
金花落滿地
kim-hue lak muá-tē
莫名開始軟跤
bo̍k-bîng khai-sí nńg-kha
敢講到這个坎站
kám-kóng kàu tsit ê khám-tsām
嘛無彩工
mā bô-tshái-kang
佇人間借來的體
tī jîn-kan tsioh lâi ê thé
呔會爛去
thài ē nuā khì
後壁跤步聲綴真絚
āu-piah kha-pōo siann tuè tsin ân
狂風絞天樂
kông-hong ká thinn-ga̍k
遍地斷籬倒壁
phiàn-tē tn̄g-lî tó-piah
就賰一步化成
tō tshun tsi̍t-pōo huà-sîng
身足疼心不安
sin tsiok thiànn sim put-an
毋知愛對佗位行
m̄-tsai ài tuì tó-uī kiânn
萬世金花
bān-sè kim-hue
花開見佛
hue khui kìnn Hu̍t
一念生極樂國
it liām sing ki̍k-lo̍k-kok
虛空有盡
hi-khong iú-tsīn
我願無窮
guá guān bû-kiông
頭前是臨終西方
thâu-tsîng sī lím-tsiong se-hong
萬世金花
bān-sè kim-hue
花開見佛
hue khui kìnn Hu̍t
一念間生極樂國
tsi̍t-liām-kan sing ki̍k-lo̍k kok
若虛空有盡
nā hi-khong iú-tsīn
我願無窮
guá guān bû-kiông
頭前就是臨終西方
thâu-tsîng tiō-sī lím-tsiong se-hong
身袂疼心不貪
sin bē thiànn sim put tham
只要我直直仔行
tsí-iàu guá ti̍t-ti̍t-á kiânn
攑金臺來迎接
gia̍h kim-tâi lâi gîng-tsiap
魂脫曼陀破迷城
hûn thuat bān-tôo phuà bê-siânn
