溫柔的月夜
《溫柔的月夜》Un-jiû ê Gue̍h-iā
泥泥Nî-nî
——————————————
咱有緣份來做堆
lán ū iân-hūn lâi tsuè-tui
可比鴛鴦伴相隨
khó-pí uan-iunn phuānn-sio-suî
何必一直吐大氣
hô-pit it-ti̍t thóo-tuā-khuì
表明你欲來離開
piáu-bîng lí beh lâi lī-khui
今夜你若來離開
kim-iā lí nā lâi lī-khui
何時會當再做堆
hô-sî ē-tàng tsài tsuè-tui
一時感覺真枉費
tsi̍t-sî kám-kak tsin óng-huì
強欲來流著珠淚
kiōng-beh lâi lâu tio̍h tsu-luī
你若認定
lí nā jīn-tīng
我是你的只有一个好伴侶
guá sī lí ê tsí-ū tsi̍t-ê hó phuānn-lī
我也甘願忍受
guá iā kam-guān jím-siū
一切佮你暫時的分離
it-tshè kah lí tsiām-sî ê hun-lî
請你帶念咱的經過
tshiánn lí tài-liām lán ê king-kuè
表明你纏綿情話
piáu-bîng lí tînn-mî tsîng-uē
我也毋願流著珠淚
guá iā m̄-guān lâu tio̍h tsu-luī
溫柔月暝
un-jiû gue̍h-mî
哪通離開
ná thang lī-khui
你咱最後的做陣
lí lán tsuè-āu ê tsuè-tīn
