思念我所愛的人
《思念我所愛的人》Su-liām Guá Sóo Ài ê Lâng
林海Lîm Hái
——————————————
若是孤單來看見
nā-sī koo-tuann lâi khuànn-kìnn
雙雙對對糖蜜甜
siang-siang-tuì-tuì thn̂g-bi̍t-tinn
引起我想起彼陣
ín-khí guá siūnn-khí hit-tsūn
引阮心稀微
ín gún sim hi-bî
心愛的小姑娘
sim-ài ê sió-koo-niû
毋知怎樣過日子
m̄-tsai tsánn-iūnn kè ji̍t-tsí
心愛的小姑娘
sim-ài ê sió-koo-niû
予我掛意思念你
hōo guá kuà-ì sù-liām lí
期待咱會得閣再來相見
kî-thāi lán ē-tit koh-tsài lâi sann-kìnn
啊~等成功的日子
ah~ tán sîng-kong ê ji̍t-tsí
若是孤單來想起
nā-sī koo-tuann lâi siūnn-khí
你我離別彼一暝
lí guá lî-pia̍t hit tsi̍t-mî
夜蟲聲親像毋願
iā-thâng siann tshin-tshiūnn m̄-guān
悲慘吼袂離
pi-tshám háu buē-lī
苦命的流浪兒
khóo-miā ê liû-lōng-jî
孤單踮在他鄉里
koo-tuann tiàm-tsāi thann-hiunn-lí
苦命的流浪兒
khóo-miā ê liû-lōng-jî
為你拍拚日連暝
uī lí phah-piànn ji̍t liân-mî
期待咱會得閣再來相見
kî-thāi lán ē-tit koh-tsài lâi sann-kìnn
啊~你毋通放袂記
ah~ lí m̄-thang pàng-buē-kì
若是孤單來聽見
nā-sī koo-tuann lâi thiann-kìnn
彼條悲哀的情詩
hit tiâu pi-ai ê tsîng-si
引起我想起彼陣
ín-khí guá siūnn-khí hit-tsūn
不覺珠淚滴
put-kak tsu-luī tih
他鄉的烏暗暝
thann-hiong ê oo-àm mî
毋過總是會記你
m̄-koh tsóng-sī ē-kì lí
他鄉的烏暗暝
thann-hiong ê oo-àm mî
予我每暗夢見你
hōo guá muí-àm bāng-kìnn lí
期待咱會得閣再來相見
kî-thāi lán ē-tit koh-tsài lâi sann-kìnn
啊~咱會閣來相見
ah~ lán ē koh lâi sann-kìnn
