心愛欲入港
《心愛欲入港》Sim-ài Beh Ji̍p-káng
金美倫Kim Bí-lûn
——————————————
到港邊欲來等待
kàu káng-pinn bueh lâi tán-thāi
心愛彼个行船人
sim-ài hit ê kiânn-tsûn-lâng
穿一領粉紅洋裝
tshīng tsi̍t-niá hún-âng iûnn-tsong
起風搖搖弄
khí-hong iô-iô lāng
若想起相逢
nā siūnn-khí siong-hông
心肝醉茫茫
sim-kuann tsuì-bông-bông
雺霧中雺霧中雺霧中
bông-bū tiong bông-bū tiong bông-bū tiong
已經看伊慢慢咧入港
í-king khuànn i bān-bān teh ji̍p-káng
一時心情輕鬆
tsi̍t-sî sim-tsîng khin-sang
一時陣心情輕鬆
tsi̍t-sî-tsūn sim-tsîng khin-sang
險險跋落港
hiám-hiám pua̍h-lo̍h káng
初戀的美妙心情
tshoo-luân ê bí-miāu sim-tsîng
實在予人想攏無
si̍t-tsāi hōo-lâng siūnn lóng bô
像一枝粉紅玫瑰
tshiūnn tsi̍t-ki hún-âng muî-kuì
妖嬌含春露
iau-kiau hâm tshun-lōo
從今後相親
tsiông-kim-āu siong-tshin
有人可相好
ū-lâng khó siong-hó
雺霧中雺霧中雺霧中
bông-bū tiong bông-bū tiong bông-bū tiong
已經看著行船的兄哥
í-king khuànn-tio̍h kiânn-tsûn ê hiann-ko
攑手對伊招呼
gia̍h-tshiú tuì i tsio-hoo
攑手來對伊招呼
gia̍h-tshiú lâi tuì i tsio-hoo
歡喜有倚靠
huann-hí ū uá-khò
彼日的船螺聲音
hit-ji̍t ê tsûn-lê siann-im
催阮心酸目屎滴
tshui gún sim sng ba̍k-sái tih
今日的船螺聲音
kim-ji̍t ê tsûn-lê siann-im
引人心纏綿
ín lâng sim tînn-mî
感謝伊倒轉阮的身軀邊
kám-siā i tò-tńg gún ê sin-khu-pinn
雺霧中雺霧中雺霧中
bông-bū tiong bông-bū tiong bông-bū tiong
已經聽著叫阮聲甘甜
í-king thiann-tio̍h kiò gún siann kam-tinn
阮也興奮叫出
gún iā hìng-hùn kiò-tshut
阮也來興奮叫出
gún iā lâi hìng-hùn kiò-tshut
心愛的名字
sim-ài ê miâ-jī
