掠龜走鱉
《掠龜走鱉》Lia̍h-ku Tsáu-pih
東方美惠Tong-hong Bí-huī
——————————————
現在社會是真怪奇
hiān-tsāi siā-huē sī tsin kuài-kî
有人賣豆奶啊咧趁錢
ū-lâng buē tāu-ling–ah teh thàn-tsînn
有人予查某來包飼
ū-lâng hōo tsa-bóo lâi pau-tshī
有人專門跋筊過日子啊
ū-lâng tsuan-bûn pua̍h-kiáu kuè ji̍t-tsí–ah
筊若贏是真歡喜
kiáu nā iânn sī tsin huann-hí
筊輸才來四啊四界覕啊
kiáu su tsiah lâi sì–ah sì-kuè bih–ah
毋通四界覕
m̄-thang sì-kè bih
毋通四界覕
m̄-thang sì-kè bih
跋筊的方式是滿滿是
pua̍h-kiáu ê hong-sik sī muá-muá-sī
有人愛拚十八仔十三支
ū-lâng ài piànn si̍p-pat-á tsa̍p-sann-ki
輸贏上緊是摃章佮phiat-sih啊
su-iânn siōng kín sī kòng-tsiong kah phiat-sih–ah
敢有影敢有影
kám ū-iánn kám ū-iánn
按呢就會輸輸去
án-ne tō ē su-su–khì
講著六合彩囉
kóng-tio̍h lio̍k-ha̍p-tshái–loh
上流行上好奕
siōng liû-hîng siōng hó-ī
阿公佮阿媽
a-kong kah a-má
啊雖然毋捌字啊
ah sui-jiân m̄-bat-jī–ah
伊嘛耍甲笑嘻嘻
i mā sńg kah tshiò hi-hi
啊共私奇輸輸去
ah kā sai-khia su-su–khì
枉費粒積囉幾十年
óng-huì lia̍p-tsik–loh kuí-tsa̍p nî
簽二四反四二
tshiam jī-sù píng sú-jī
三八的開對特別號去
sam-pat–ê khui tuì ti̍k-pia̍t-hō khì
雖然小可仔錢啊
sui-jiân sió-khuá-á tsînn–ah
毋通奕
m̄-thang ī
毋通奕
m̄-thang ī
千萬毋通奕喔
tshian-bān m̄-thang ī–ooh
有人愛啉酒
ū-lâng ài lim-tsiú
酒醉無了時啊
tsiú-tsuì bô-liáu-sî–ah
酒精中毒無藥醫
tsiú-tsing tiòng-to̍k bô io̍h i
閻王下令召伊去
Giâm-ông hā-līng tiàu i khì
有人愛粉味啊
ū-lâng ài hún-bī–ah
厝內某囝毋愛挃
tshù-lāi bóo-kiánn m̄-ài ti̍h
偏偏去愛著酒家女
phian-phian khì ài-tio̍h tsiú-ka-lí
約伊散步啉咖啡
iok i sàn-pōo lim ka-pi
啉咖啡啉咖啡
lim ka-pi lim ka-pi
約伊散步啉咖啡
iok i sàn-pōo lim ka-pi
伊煞佮彼號有錢囉
i suah kah hit-lō ū-tsînn–loh
老阿伯仔去踅夜市仔囉
lāu-a-peh–á khì se̍h iā-tshī-á–loh
害我等啊等規暝
hāi guá tán–ah tán kui-mî
啊無錢囉
ah bô tsînn–loh
想欲轉去某囝的身軀邊
siūnn-beh tńg-khì bóo-kiánn ê sin-khu-pinn
無疑某囝煞來
bô-gî bóo-kiánn suah lâi
綴啊別人去啊
tuè–ah pa̍t-lâng khì–ah
勸咱逐家毋通貪小利啊
khǹg lán ta̍k-ke m̄-thang tham siáu-lī–ah
趁偌濟食偌濟
thàn guā-tsuē tsia̍h guā-tsuē
光明正大來交際
kong-bîng tsìng-tāi lâi kau-tsè
萬事著愛安份守己
bān-sū tio̍h-ài an-hūn siú-kí
才袂掠龜走鱉
tsiah bē lia̍h-ku tsáu-pih
