嚨喉借過
《嚨喉借過》Nâ-âu Tsioh-kuè
男子漢樂團Lâm-tsú-hàn Ga̍k-thuân
董事長樂團Táng-sū-tiúnn Ga̍k-thuân
——————————————
來吧這杯斟予滿
lâi–pah tsit pue thîn hōo muá
一喙啉予焦
tsi̍t-tshuì lim hōo ta
所有的後悔
sóo-ū ê hiō-hué
嚨喉借過
nâ-âu tsioh-kuè
鬥陣閣啉一杯
tàu-tīn koh lim tsi̍t-pue
—
飄撇是阮的名
phiau-phiat sī gún ê miâ
青春是美麗的花
tshing-tshun sī bí-lē ê hue
過去姑不而將
kuè-khì koo-put-jî-tsiong
愛情是遙遠的月
ài-tsîng sī iâu-uán ê gue̍h
放蕩咧過日子
hòng-tōng teh kuè ji̍t-tsí
敢擔會起現實的拖磨
kám tann ē-khí hiān-si̍t ê thua-buâ
人生啊總是不如意
jîn-sing–ah tsóng–sī put-jû-ì
你敢毋是空虛的暗暝
lí kám m̄-sī khang-hi ê àm-mî
來吧這杯(你)斟予滿
lâi–pah tsit pue (lí) thîn hōo muá
一喙啉予焦
tsi̍t-tshuì lim hōo ta
所有的怨嘆
sóo-ū ê uàn-thàn
攏隨風去
lóng suî hong khì
今夜欲醉規暝
kim-iā beh tsuì kui-mî
來吧這杯斟予滿
lâi–pah tsit pue thîn hōo muá
一喙啉予焦
tsi̍t-tshuì lim hōo ta
所有的後悔
sóo-ū ê hiō-hué
嚨喉借過
nâ-âu tsioh-kuè
鬥陣閣啉一杯
tàu-tīn koh lim tsi̍t-pue
天光才清醒
thinn kng tsiah tshing-tshénn
