為愛著忍耐
《為愛著忍耐》Uī Ài Tio̍h Jím-nāi
何文鐘Hô Bûn-tsiong
——————————————
一見鍾情來熟似
it-kiàn tsiong-tsîng lâi si̍k-sāi
心內對你有意愛
sim-lāi tuì lí ū ì-ài
雖然你我真情佮真愛
sui-jiân lí guá tsin-tsîng kah tsin-ài
可惜毋敢講出來
khó-sioh m̄-kánn kóng–tshut-lâi
毋甘笑阮戇大呆
m̄-kam tshiò gún gōng-tuā-tai
對你照顧
tuì lí tsiàu-kòo
對你關懷
tuì lí kuan-huâi
相信你也會了解
siong-sìn lí iā ē liáu-kái
黃昏約會頭一擺
hông-hun iok-huē thâu tsi̍t-pái
心內情話訴出來
sim-lāi tsîng-uē sòo–tshut-lâi
咱兩人相親佮相愛
lán nn̄g-lâng siong-tshin kah siong-ài
你我歡喜在心內
lí guá huann-hí tsāi sim-lāi
為著你為著我
uī-tio̍h lí uī-tio̍h guá
一切著忍耐
it-tshè tio̍h jím-nāi
毋驚任何的阻礙
m̄-kiann jīm-hô ê tsóo-gāi
互相鼓勵
hōo-siong kóo-lē
互相關懷
hōo-siong kuan-huâi
創造幸福的將來
tshòng-tsō hīng-hok ê tsiong-lâi
