澄清湖之戀
《澄清湖之戀》Tîng-tshing-ôo tsi Luân
江龍Kang-liông
——————————————
舊年中秋月光暝
kū-nî tiong-tshiu ge̍h-kng-mî
感覺心空虛
kám-kak sim khang-hi
澄清湖邊賞月圓
Tîng-tshing-ôo pinn siúnn ge̍h-înn
人山人海滿滿是
jîn-san jîn-hái muá-muá-sī
青年男女成雙對
tshing-liân lâm-lí sîng-siang-tuì
只有阮自己
tsí-ū gún tsū-kí
媠姑娘仔對阮使目墘
suí koo-niû-á tuì gún sái ba̍k-kînn
引起阮愛慕伊
ín-khí gún ài-bōo i
想欲佮伊做伴侶
siūnn-beh kah i tsuè phuānn-lī
阮向前問伊
gún hiòng-tsiân mn̄g i
才知伊是漁村女
tsiah tsai i sī hî-tshuan-lí
歹勢面煞紅記記
pháinn-sè bīn suah âng-kì-kì
情投意合做伴侶
tsîng tâu ì ha̍p tsuè phuānn-lī
遊山佮玩水
iû-san kah uán-suí
因為一直落雨到深更
in-uī it-ti̍t lo̍h-hōo kàu tshim-kinn
姑不將來分離
koo-put-tsiong lâi hun-lî
約束今年元宵暝
iok-sok kin-nî guân-siau-mî
澄清湖再見
Tîng-tshing-ôo tsài-kiàn
為何看無愛人仔伊
uī-hô khuànn-bô ài-jîn-á i
敢是伊來變心意
kám-sī i lâi piàn sim-ì
抑是爸母反對伊
ia̍h-sī pē-bú huán-tuì i
愛情變苦味
ài-tsîng piàn khóo-bī
怨嘆著阮佮伊配袂起
uàn-thàn tio̍h gún kah i phuè buē-khí
暗傷悲思念伊
àm siong-pi su-liām i
