毋免閣聽媒人喙
《毋免閣聽媒人喙》M̄-bián Koh Thiann Muê-lâng-tshuì
吳珮琪Ngôo Puē-kî
——————————————
花蕊若開
hue-luí nā khui
蝴蝶亂亂飛
ôo-tia̍p luān-luān hui
阿娘仔若生媠
a-niû-á nā senn suí
阿君仔直直追
a-kun–á ti̍t-ti̍t tui
花是為著蝴蝶開
hue sī uī-tio̍h ôo-tia̍p khui
阿娘仔是為著阿君仔媠
a-niû-á sī uī-tio̍h a-kun–á suí
毋免閣聽媒人喙
m̄-bián koh thiann muê-lâng-tshuì
咱來行做堆
lán lâi kiânn tsuè-tui
阮是花蕊
gún sī hue-luí
為著你來開
uī-tio̍h lí lâi khui
你若是有真情
lí nā sī ū tsin-tsîng
散赤也無所謂
sàn-tshiah iā bû-sóo-uī
阮無像人貪富貴
gún bô tshiūnn lâng tham hù-kuì
絕對是無害你克虧
tsua̍t-tuì sī bô hāi lí khik-khui
何必門當佮戶對
hô-pit mn̂g-tong kah hōo-tuì
咱來行做堆
lán lâi kiânn tsuè-tui
