單戀
《單戀》Tan-luân
西卿Se-khing
——————————————
暗中愛慕彼个人
àm-tiong ài-bōo hit ê lâng
一片真情對伊送
tsi̍t-phiàn tsin-tsîng tuì i sàng
為愛情日思夜夢
uī ài-tsîng ji̍t-su iā-bāng
阮也真甘願
gún iā tsin kam-guān
毋管別人對著阮
m̄-kuán pa̍t-lâng tuì tio̍h gún
怎樣來戲弄
tsuánn-iūnn lâi hì-lāng
阮對伊的感情
gún tuì i ê kám-tsîng
絕對袂搖動
tsua̍t-tuì buē iô-tāng
心內真正愛慕伊
sim-lāi tsin-tsiànn ài-bōo i
偏偏毋敢講出喙
phian-phian m̄-kánn kóng tshut-tshuì
這款的矛盾心理
tsit khuán ê mâu-tún sim-lí
害阮嘆相思
hāi gún thàn siunn-si
若是看著伊身邊
nā sī khuànn-tio̍h i sin-pinn
另外有伴侶
līng-guā ū phuānn-lī
加添阮心哀悲
ka-thiam gún sim ai-pi
對天吐大氣
tuì thinn thóo-tuā-khuì
